Siglir tar il cuntegn

Header

video
L’interpresa da construcziun Pitsch SA va concurs
Or da Telesguard dals 30.04.2018.
laschar ir. Durada: 2 minutas 31 Secundas.
cuntegn

Chantun Pitsch SA na bajegia betg pli

L'interpresa da construcziun Andrea Pitsch SA ha deponì la bilantscha e serra il manaschi. En tut giajan uschia radund 200 plazzas a perder, communitgescha l'interpresa.

I vegnia construì massivamain pli pauc en il Grischun ed ils pretschs vegnian smatgads a moda ruinusa, uschia argumenteschan l'interpresa da construcziun quest pass. Plinavant haja er l'iniziativa cunter abitaziuns secundaras ed il ferm franc svizzer manà l'interpresa en questa situaziun.

Il culp mortal sajan ils problems da liquiditad stads. La famiglia fiss stada pronta d’investir milliuns, las bancas na levian dentant betg surpigliar il risico, di Marco Pitsch, parsura da la direcziun.

Nus avessan stuì relaschar gia il 2012 in terz dal persunal

Problems da liquiditad, in plan da sanaziun che ha fatg naufragi, nagin successur per la fatschenta. Uschia hajan els stuì prender la decisiun difficila da serrar il manaschi. In grond sbagl strategic hajan els sezs fatg. Cura che l’iniziativa da segundas abitaziuns è vegnida acceptada avessan els immediat stuì relaschar in terz dal persunal. Quai n’hajan els dentant betg fatg cun la speranza, che l’iniziativa n’haja betg uschè nauschas consequenzas sco prognostitgà.

audio
Saira: Las raschuns daco che la firma da bajegiar Pitsch chala
ord Actualitad dals 30.04.2018.
laschar ir. Durada: 2 minutas 47 Secundas.

Pitsch SA betg cumpiglià en investigaziuns da la WEKO

L'interpresa da construcziuns suttastritga ch'ella na saja betg stada cumpigliada en las investigaziuns da la cumissiun da concurrenza WEKO en connex cun las cunvegnas da pretschs tar la branscha. La decisiun da serrar il manaschi saja vegnida fatga independentamain da las investigaziuns da las autoritads federalas.

Filialas en l'entir Grischun

L'Andrea Pitsch SA era vegnida fundada l'onn 1955 a San Murezzan ed ha filialas a Tusaun, Arosa e Flem.

RR novitads 11:00

Artitgels legids il pli savens