El ha 28 onns, è architect e lavura sco scrinari, è commember da la suprastanza da «Davos Dahai», commember da la cummissiun da gestiun da Tavau, commember dal parlament da Tavau, commember da la suprastonza dal'associaziun da locataris grischuna e president da l'uniun «IG offenes Davos» - ed uss è el er anc il nov president da la PS dal chantun Grischun: Philipp Wilhelm da Tavau.
La via en la politica ha Wilhelm chattà l'emprim sur la Juso, pli tard sco commember ed er sco suprastant da la secziun da la PS Tavau.
El veglia far tut ses pussaivel e s'engaschar per bunas cundiziuns da viver en il Grischun. Quai muntia abitaziuns pajablas, taglias gistas, in bun access tar scolaziun e cultura sco er tar tgira cumplementara d'uffants e tar instituziuns sozialas.
Wilhelm surpiglia il timun da Jon Pult che ha presidià la PS Grischuna davent dal 2009.
Chatrina Josty sco nova vice
Sco vicepresidenta e successura da Silvia Modalek è vegnida elegida Chatrina Josty da Bravuogn. La scolasta a Lai ed anteriura schurnalista da RTR è gia creschida si en ina familia nua che la politica era adina puspè in tema. E durant ses temp davos la camera haja ella sentì ch'ella na veglia betg esser be en la rolla da l'observatura, mabain er sezza vegnir activa e far politica.