PH Turgovia cun purschida da rumantsch

Scolasts che dattan scola sin il stgalim gimnasial senza diplom pedagogic ston prender suenter quel - er per rumantsch. E quai pon els per exempel er far ensemen cun la scol'auta pedagogica da la Turgovia. Quella vegn schizunt tar els en l'Engiadina...

En stanza da scola: Persunas d'instrucziun gimnasialas ston prender suenter il "Lehramt" sch'ellas na han betg fatg quel.

Legenda da maletgs: Academia Persunas d'instrucziun gimnasialas ston prender suenter il "Lehramt" sch'ellas na han betg fatg quel. RTR, David Spinnler

I tuna suenter dapli che quai ch'igl è: La scol'auta pedagogica da la Turgovia ha ina nova purschida per rumantsch. I na dat dentant betg curs da rumantsch ubain in nov studi da rumantsch, mabain: Ils scolasts ch'instrueschan rumantsch sin il livel gimnasial e n'han betg fatg il diplom per sec 2, il «Lehramt» sco quai ch'ins di, pon, u meglier ditg ston prender suenter quai diplom. Bainchapì, tut quels ch'instrueschan senza diplom ston far quai, betg mo las persunas ch'instrueschan rumantsch. Il squitsch da far quai è vegnì dal chantun. «Atgnamain stuessan las persunas d'instrucziun schon avair il diplom cura ch'ellas cumenzan», di Hans Peter Märchy, il manader da l'uffizi per furmaziun media superiura.

Il docent vegn tar il student

Ch'igl è gist la PH da la Turgovia che fa uschè ina purschida er per rumantsch ha differents motivs. Per l'ina n'ha la PH Grischuna betg ina tala purschida - ella ha be ina furmaziun per instruir sin il stgalim primar ubain er secundar. Per l'autra ha la PH Turgovia gia fatg in project sumegliant ensemen cun la scola chantunala. E la PH Turgovia è flexibla. Uschè flexibla, ch'il docent vegn schizunt tar ils students. En l'Engiadina èn ils scolasts gimnasials che ston prender suenter il diplom numnadamain sa mess ensemen tar ina classa da radund 30 persunas. E per che quellas na stoppian betg ir adina puspè a Kreuzlingen, vegn il docent per parts dal studi simplamain en l'Engiadina.

RR actualitad 12:00