Pertge betg spustar la stagiun d'enviern?

La mancanza da naiv na lascha betg anc sentir bler da la stagiun d'enviern. Dentant, spustar la stagiun e chalar pir suenter Pasca, quai na giess betg.

spunda verda da breil cun la pista mo perlung dals chanuns da naiv

Legenda da maletgs: Pertge betg spustar la stagiun sin lura, cura che la naiv vegn? RTR, G. Hosang

«Per pudair spustar la stagiun d'enviern stuessan ins midar tut ils plans da vacanzas da scola» ubain «ins stuess guardar cun Roma da spustar Nadal per in mais». Quai èn respostas sin la dumonda, sche quai na fiss betg pussaivel da prolungar la stagiun d'enviern, per cas ch'ella cumenza pir il schaner sco quest onn.

Avrir era durant las autras stagiuns da l'onn - almain punctual

Singulas pendicularas e singuls hotels hajan avert er suenter Pasca, dentant per la gronda part na rendia quai betg. Er betg, sche Pasca saja - sco uonn - fitg baud: «Suenter Pasca è tar ils pli blers il 'Pfupf' da vulair ir sin pista ora, quai avain nus vesì fitg bain ils davos onns», di Silvio Schmid, president da las pendicularas grischunas.

Sco Ernst Wyrsch, president da hotelleriesuisse Grischun agiunscha, dettia quai dentant er la pussaivladad per hotels da vegnir in zic pli flexibels. «In model dal futur è dad avrir l'hotel per insaquants dis er durant la tranterstagiun, dentant mo sche la dumonda è gronda avunda.» Uschia as possia tuttina anc far in zic pli lunga la stagiun.

RR Actualitad bunura 06:00