Siglir tar il cuntegn

Header

cuntegn

Chantun Perquai eran las prognosas uschè faussas

Las bleras prognosas avevan prevesì in auter resultat, tenor las bleras avess Hillary Clinton gì da gudagnar las elecziuns en ils Stadis Unids. Dentant pertge èn tantas prognosas stadas taluisa faussas?

Roman Liesch, expert per retschertgas ed opiniuns publicas ha pliras decleraziuns pertge che blers han prognostitgà fauss. Ils problems per far prognosas cumenzan numnadamain schon tar chattar participants che represchentan l'entira populaziun americana. Bleras giadas èn quels che sa participeschan insumma ad ina retschertga interessads politicamain ed han gia ina opiniun. Quai è l'emprim obstachel.

audio
Retschertgas na funcziunan betg adina - ex. Brexit/Trump/Clinton
ord Actualitad dals 12.11.2016.
laschar ir. Durada: 3 minutas 3 Secundas.

Lura na dattan quels che fan part a la retschertga er betg adina resposta correctamain. Sche las medias e la maioritad èn da l'opiniun che Clinton gudogna, sche respundan blers er en quella direcziun, malgrà ch'els voteschan lura insatge auter. Sociologs hajan perscrutà che quai saja uschia perquai ch'il carstgaun veglia esser part da la maioritad, di Roman Liesch.

A propos medias: Pli fitg che las medias rapportian che Clinton gudogna, e pli blers adherents da Trump che vegnan mobilisads e giajan en il local d'eleger. Ils fans da Clinton perencunter quintan ch'ella vegnia elegida. Quai possia er esser in effect.

«The winner takes it all» fa quai anc pli cumplitgà

Per far prognosas per ils Stadis Unids vegn anc vitiers, ch'il sistem electoral cumplitgescha tut in zic. Normalmain dat quai tar ina retschertga cun 1'000 participants ina marscha da sbagls da plus minus trais puncts procentuals.

Simplamain dumandar 1'000 americans giess dentant betg tar elecziuns, perquai che quellas vegnan per part fatgas tenor il principi «the winner takes it all». Vul dir: er sche la differenza da vuschs en la populaziun era be fitg pitschna, van tut las vuschs dals delegads al «winner». Per far la prognosa pli exacta stuess ins pia dumandar en mintga stadi american 1'000 persunas davart lur opiniun.

RR actualitad 07:00

Artitgels legids il pli savens