Siglir tar il cuntegn
cuntegn

Chantun Pendicularas spetgan vess sin la proxima naiv

L'entschatta da quest mais hai finalmain dà l’emprima giada in pau naiv. Uschia han era las pendicularas che n’èn betg en possess da chanuns da naiv pudì far pista. Ma co vesi ora ussa? Dovran ils territoris grischuns puspè naiv?

Betg dapertut dastgan ils skiunzs e las skiunzas giudair naiv senza fin sin pista.
Legenda: Betg dapertut dastgan ils skiunzs e las skiunzas giudair naiv senza fin sin pista. Keystone

Pendicularas grondas en noss chantun, sco per exempel Arosa/Lai, San Murezzan u Flem/Laax/Falera han nagin problem da naiv. Els fissan cuntents sche la naiv vegniss, mo grazia als chanuns da naiv n'è la situaziun betg critica.

Problems da naiv pli pitschens e pli gronds

A Sursaissa-Mundaun è la situaziun actualmain mediocra. Sin pistas che na vegnan betg ennavadas è la naiv propi stgarsa di Rita Holderegger dal territori da skis. Uschia ch’i sa legrassan sche dunna Holla vegniss puspè en acziun.

Las pendicularas da Mustér possedan nagins chanuns da naiv. Tuttina sajan quasi tuttas pistas avertas actualmain, di il directur Rudolf Büchi. Quai haja er da far cun il fatg ch’il territori è situads fitg auts.

Il pli critic è la situaziun actualmain en ils territoris pitschens. Cuera-Brambrüesch ha avert las pistas, ma la cuverta da naiv è tut autra che grossa. Anc mender vesi ora tar las pendicularas da Minschuns en la Val Müstair. Sulettamain il runal d’uffants è averts. Blers territoris spetgan pia cun malpazienza sin «dunna Holla».

RR actualitad 07:00