Siglir tar il cuntegn

Chantun Pendicularas duain sa focusar

Las pendicularas svizras e grischunas han grevs onns davos ellas ed èn per part sut squitsch. Ils giasts mancan, ils raps era. La schliaziun duain esser novas fieras ed il sa focusar pli cler sin singulas gruppas da giasts. Quai mussa in rapport da la firma grischconsulta.

pendiculara sur ina val vi
Legenda: Las pendicularas pateschan pervia da divers facturs. Per surmuntar la crisa èn novas ideas dumandadas. RTR

Sin incumbensa da las pendicularas svizras ha la firma grischuna fatg divers studis cun pliras enconuschientschas. D'ina vart saja impurtant, dad investir dapli en las novas fieras sco l’India, la China, la Brasilia ed ils Stadis Unids. Da l’autra vart valia da meglierar las purschidas per ils giasts da tschep ord las terras vischinantas.

In segment da giasts fitg impurtant sajan ils seniors. Qua stoppian las pendicularas e las destinaziuns metter ensemen purschidas specificas tenor ils basegns dals giasts. Quels na stoppian betg exnum avair in connex cun il sport da skis.

Sch’il product constat, n’è il pretsch gnanc uschè relevant.
Autur: Roland Zeggmanader da fatschenta grischaconsulta

Era las famiglias restan sa chapescha in segment da giasts fitg impurtant. Tenor il manader dal studi, Roland Zegg, saja dentant da guardar qua exact sin il pretsch. Las famiglias na sajan tenor las retschertgas betg prontas d'investir dapli che 1’700 francs per in’emna vacanzas d’enviern.

Davent da l’entschatta dal 2017 vul grischconsulta avair pront in manual che duai pussibilitar a las destinaziuns e las pendicularas dad elavurar ina strategia che fa senn per l’infrastructura e las purschidas pussiblas.