Siglir tar il cuntegn
Inhalt

Chantun PCD vul puspè in segund sez en la regenza

La suprastanza giess gugent en il cumbat cun Marcus Caduff da la PCD Surselva e CEO da l'ospital regiunal Glion. Perquai propona la suprastanza als delegads dad ir cun dus candidats en il cumbat electoral 2018.

Marcus Caduff
Legenda: Marcus Caduff sco candidat – quai fiss il giavisch da la suprastanza chantunala. ANR, Flurin Andry

Marcus Caduff ch'è er president da la fracziun Lumnezia dals cristiandemocrats duai ir sper il cusseglier guvernativ da fin qua, Mario Cavigelli, en il cumbat per las elecziuns da la regenza l'onn che vegn.

Nus essan en la buna situaziun che nus avain chattà in candidat fitg renumà, bain scolà ed er cun blera experientscha politica ed en la professiun.
Autur: Stefan Englerpresident PCD Grischun

Il president da partida Stefan Engler è cuntent cun la tscherna dal candidat. Cun Marcus Caduff haja la partida chattà in persuna cun blera experientscha politica, experientscha da vita ed er ina tscherta prestaziun en la vita professiunala. E quai è necessari per uschia in post.

Far insatge cunter la centralisaziun

Marcus Caduff ha pir il cumenzament da quai onn surprendì la direcziun dal Spital Regiunal Surselva, tuttina vul el uss candidar per il post en la regenza. La PCD haja constatà ina tendenza che tut vegnia adina centralisà pli fitg.

I dat la tendenza che la regiun periferica na vegn betg udida pli e jau crai che nus pudain betg adina be admonir che quai saja uschia, mabain nus stuain empruvar da midar quai.
Autur: Marcus Caduffschef da fracziun da la PCD

Decider davart ils candidats sco er davart ina candidatura dubla u singula ston dentant ils delegads. La decisiun croda ils 23 d'avust a la radunanza da delegads.

Il cumbat – situaziun actuala

Gia definì ils candidats ha la PBD: Ils burgaisdemocrats tramettan en il cumbat il cusseglier guvernativ da fin quai Jon Domenic Parolini ed Andreas Felix. Felix duai defender il sez da la ministra da finanzas Barbara Janom Steiner che ha cuntanschì la limita da periodas d'uffizi. Er la Partida socialdemocrata ha gia definì ses candidat: Peter Peyer duai defender il sez dal minister d'educaziun e cultura, Martin Jäger che ha annunzià da betg candidar in'ulteriura giada.

RR novitads 11:00