Siglir tar il cuntegn
cuntegn

Chantun PBD vul defender ses dus sezs en la regenza

L'onn 2018 ha il Grischun d'eleger il parlament e la regenza. Per la partida burgais democratica PBD èsi cler, ch'ella vul defender en spezial il sez da Barbara Janom Steiner che sto sa retrair pervi da la limita d'uffizi. Il sez da Jon Domenic Parolini è probablamain betg en privel.

Legenda: Guardar il video PBD fa propiests. Durada 00:36 minutas.
Or da RTR dals 09.01.2017.

L'onn 2017 saja da planisar e preparar las elecziuns dal 2018. Quai ha ditg il president da partida Andreas Felix a l'apéro da Bumaun en il hotel Chur a Cuira. El saja optimistic, perquai ch'ils commembers hajan mussà en il passà ch'els sajan pront da surpigliar in uffizi e dad ir là, nua ch'i dettia nodas blauas. Cun luschezza ha Felix er menziunà ils success da la PBD a las elecziuns communalas sco per exempel a Claustra, Domat, Flem, Landquart, Tavau u Val Müstair.

A lunga vista crescha en la populaziun il basegn da vairas soluziuns e vairs progress, senza ils suns auts che numnan sulettamain il problem, senza avair soluziuns. Da quai sun jau persvas.
Autur: Andreas Felixpresident PBD Grischun

Er l'anteriur president dal Cussegl grond, Ueli Bleiker, spera, che la partida burgais democratica na saja betg mo stada ina chaussa da curta durada. I vegnia grev en questa cuntrada politica polarisanta, manegia Bleiker. Dumandads sajan ils strategs da la partida che ston guardar che la partida na vegnia betg smardegliada en il center politic.

RR actualitad 17:00