Siglir tar il cuntegn

Header

Navigaziun

Paucas schanzas per traffic public gratuit per giasts en grischun
Legenda: En grischun custa il trafic public vinavant era per turists. Keystone
cuntegn

Chantun Paucas schanzas per traffic public gratuit per giasts en Grischun

En sis chantuns da la Svizra Orientala pon ils giasts ir gratuit cun il traffic public. Per il Grischun na fiss quai per il mument nagina opziun. La sfida: las finanzas.

Regenza e turistichers èn sceptics

L'idea da porscher als giasts il traffic public gratuit è tenor regenza e turistichers grischuns en sasez ina idea cun potenzial per attrair dapli giasts en il Grischun.

Ernst Wyrsch
Legenda: Ernst Wyrsch Hotellerisuisse GR RTR
L’idea benevent jau, dentant datti gronds segns da dumonda tar la finanziaziun.
Autur: Ernst WyrschPresident da hotelleriesuisse Grischun

In grond segn da dumonda è la finanziaziun dad in tal project. Perquai na vesa la regenza grischuna per il mument nagina schanza per far vegnir il traffic public gratuit per turists. Sch'ins veglia tuttina porscher il trafic public gratuit, lura stoppian las vischnauncas e destinaziuns finanziar quai, e betg la regenza.

Jon Domenic Parolini
Legenda: Jon Domenic Parolini Regenza GR RTR
A Scuol avainsa fatg avant onns ina tala emprova. L'emprim cun success, dentant suenter in pèr onns n'è il quint betg pli ì si.
Autur: Jon Domenic ParoliniCusseglier guvernativ e directur d’economia

Il motiv perquai ch'ins discurra da l'opziun da porscher il traffic public gratuit è ch'ils sis chantuns da la Svizra Orientala han lantschà in tal project cun num «Oskar». In dals iniziants dal proget è Bruno Vattioni. El è persvas dad Oskar ch'è actualmain però en la fasa da test.

Per il mument na ves jau betg ina collavuraziun dad Oskar cun il Grischun. Nus essan anc en la fasa da test. Sch'il project ha però success, lura beneventas jau ina collavuraziun.
Autur: Bruno VattioniIniziant dad OSKAR ed manader da las pendicularas da Säntis

Sche Oskar è a lunga vista ina buna chaussa u betg, na pon ins anc betg dir. Perquai na vesa el per il mument nagina collavuraziun cun il Grischun. Era causa ch'il Grischun ha in'autra grondezza, ed autras gruppas turisticas en mira. Sch'il project mussa success cun l'ir dals onns, lura beneventass el ina collavuraziun cun il Grischun.

Grischun vacanzas optimistic

Auter vesa il project Grischun vacanzas. Tenor Martin Vincenz avess in tal project in grond potenzial. Grischun Vacanzas vul perfin installar ina gruppa da lavur che duai evaluar, co ch'ins pudess porscher als turists ina tala offerta. Il problem da finanziar la purschida è incontestà da Martin Vincenz.

Grischun vacanzas
Legenda: Martin Vincenz Grischun Vacanzas. RTR
Nus vulain ch'ils giasts pon ir gratuit cun il traffic public. Quai fiss ina schanza per il turissem grischun.
Autur: Martin VincenzCEO da Grischun Vacanzas

Dentant è quai in project che n'ha betg prioritad per il mument. E perquai ha il project per traffic public gratuit per giasts en il Grischun paucas schanzas.

RR actualitad bunura 06:00

«Oskar»

Oskar è ina carta per giasts che custa 10 francs e porscha diversas offertas gratuitas, sco per exempel il traffic public, visitas en museums, pendicularas ed autras offertas turisticas. Dapi il zercladur 2016 datti ella en ils chantuns Schaffusa, Turgovia, Glaruna, Appenzell Dadens e Dadora e Son Gagl.