Siglir tar il cuntegn

Chantun Partidas giuvnas cun auts e bass

L'onn d'elecziun 1987 n'han anc neginas partidas giuvnas candidà cun glistas per las elecziuns dal Cussegl naziunal. Er l'onn 1991 n'èn neginas partidas giuvnas da chattar. Persuenter gruppaziuns da giuvens. Ils "Giuvens Grischuns", in project da scola, ed ils "Giuven 91" van en il cumbat.

politichers giuvens durant ina discussiun
Legenda: Las partidas giuvnas dovran persunas engaschadas e motivadas. (archiv) Keystone

Omaduas gruppaziuns fan var 4000 vuschs. Ed ils giuvens? Ils «Giuven 91» han schizunt gidà la PS da gudagnar in sez en il Cussegl naziunal, uschia l'istoricher e schurnalist Hansmartin Schmid. Il 1995 èsi lura i liber endretg. Las partidas etablidas han vis il potenzial dals giuvens ed uschia han la PPS e la PCD fundà partidas giuvnas. L'onn d'elecziun 1999 èn lura tut las partidas grondas pia er la PLD e la PS, idas en il cumbat electoral cun glistas giuvnas.

Moviment dad unda

Sco tar las partidas mamma han dentant er las partidas giuvnas auts e bas. Inaga ha ina success ed in'autra ga puspè in'autra. Tenor Hansmartin Schmid giascha quai cunzunt vidlonder ch'i dependa fitg tgi ch'è grad en la partida e con motivads che quels èn. Sch'i ha insaquants che tiran il car lu ha la partida success, uschiglio betg. In bun exempel per il moviment dad unda è la PLD ch'è il 1999 ida en il cumbat cun tgaus sco Martin Schmid, Christian Rathgeb ni Urs Marti - oz èn els cusseglier dals chantuns, cusseglier naziunal e president da la citad da Cuira.

Ils davos onns saja la PLD giuvna dentant sa durmentada in zic uschia Hansmartin Schmid. I saja dentant senz'auter pussaivel ch'ella sa dedesta puspè ord sia sien. Tar las davosas elecziuns il 2011 han cunzunt la PCD giuvna e la PS giuvna, ils JUSOS, rimnà fitg bleras vuschs, ed uschia purtà vuschs a lur partidas mamma.