L'institut da turissem e temp liber da la Scola auta da tecnica ed economia (HTW) Cuira e la rait globala dad alumni, Hosco han annunzià lur collavuraziun a Berlin. Tras la collavuraziun possian absolvents dals studis da turissem da la HTW profitar dals avantatgs da la plattafurma globala.
Hosco è la pli gronda plattafurma da manaschis da restauraziun e da turissem dal mund. Plinavant unescha quella plattafurma ils pli impurtants acturs da l'industria tar ina communitad online ed avra cunquai las portas tar pli che 50'000 plazzas da lavur. Quai en passa 40 pajais e cun radund 3'000 patruns potenzials. Cun la collavuraziun survegnan ils students da la HTW a Cuira access a la plattafurma e cun quai er a raits e plazzas exclusivas.
