Siglir tar il cuntegn

Header

Navigaziun

Legenda: Guardar il video Quant pront ch'il Grischun è per la midada da la Banca Naziunala Svizra. Durada 03:17 minutas.
Or da Telesguard dals 16.01.2015.
cuntegn

Chantun Parolini: «Pudess avair consequenzas fitg nauschas»

Turissem e regenza dal Grischun èn d'accord: Ussa èsi l'emprim d'analisar da rudien la situaziun. Ch'i dovra mesiras è indiscutabel per tuts.

Per il minister d'economia grischun Jon Domenic Parolini pudessan las mesiras da la Banca naziunala svizra, ch'ha schlià per immediat la limita da l'euro, avair consequenzas fitg nauschas. Tenor el munta la situaziun tut tenor ch'ils products d'export grischuns - sco il turissem - vegnian per 20% pli chars.

«Ina nauscha surpraisa, ch'gl ei d'acceptar.
Autur: Marcel FribergPresident Grischun Vacanzas

Per il president Marcel Friberg èsi cler: Grischun vacanzas sto ir en clausura e ponderar ils proxims pass. Central saja ussa però era dad observar ils moviments a la fiera. Là dettia quai dus scenaris centrals:

  • mender cas: l'euro croda anc pli fitg ed il turissem grischun perda anc dapli giasts da l'Europa che na vegnan betg, e perda era ils giasts svizzers che van en l'exteriur
  • meglier cas: il martga sa revegn e sa stabilisescha puspè sin in tschert nivel e vegn da cumpensar ina pitschna perdita cun giasts d'auters stadis

Per la branscha da turissem grischuna, fiss Friberg gia cuntent, sch'il curs sa stabilisass tranter CHF 1.10 e CHF 1.15 vers l'euro.

Surtut regiuns sco l'Engiadina vegnan a sentir.
Autur: Andrea ZülligPresident Hotelleriesuisse

Il president da Hotelleriesuisse Andrea Züllig spetga paucas consequenzas la stagiun d'enviern. Per la stad e l'atun proxim èsi tenor però da quintar cun reducziuns massivas.

Ina gronda surpraisa saja la midada da la Banca naziunala svizra stada, ha ditg Andrea Züllig vers la televisiun SRF. Che la banca haja stuì reagir insacura, saja bain stà cler. El haja plitost spetgà che la banca lia il franc vi dal dollar, e sbassia la limita dal curs garantì pass per pass fin a radund CHF 1.10 per l'euro.

Consequenzas sajan da spetgar surtut per regiuns cun blers giasts da l'exteriur. Sco exempel numna Züllig l'Engiadina ch'haja blers giasts da la Germania e da l'Italia. Consequenzas pli grondas spetga Züllig ch'ins sentia en il decurs da l'onn - vers la stad e l'atun.

Surprendent è stà il termin dad oz.
Autur: Magdalena Martullo-BlocherSchefa Ems Chemie

La schefa da l'Ems Chemie a Domat Magdalena Martullo-Blocher ha vesì che la situaziun dal franc vers l'euro saja sa midada - ed ha spetgà ina decisiun da la Banca naziunala svizra; però betg oz.