Votantas e votants da Claustra decidan davart la nova chasa da parcar cun circa 430 parcadis. Var in terz da quels duain esser reservads per il ressort da famiglia «Ober Ganda» – in project ch’ils da Claustra han approvà il november passà. Lura ha la vischnanca dentant emblidà da metter en votaziun il dretg da construcziun per la chasa da parcar. In tal dretg existiva gia dapi ils onns 60, dentant valeva quel per parcadis averts e betg per chasas da parcar. Il ressort sco tal vegnia tenor la vischnanca dentant en scadin cas realisà. Sch'i dess in NA a l'urna stuessi dentant dar ina revisiun da l'entir dretg da construcziun da las pendicularas Madrisa. Quai na chaschunass betg mo in retard da l'entir project, mabain ch'il suveran decidess davart il futur da la pendiculara sco tala.
Opposiziun cunter il project
Cun la nova votaziun è era ina opposiziun sa furmada. Quella vul cunzunt animar discussiuns e sa metter en per in vitg durabel. Tenor l'opposiziun na fetschia il project betg senn perquai che la vischnanca da Claustra posseda gia avunda pussaivladads d'albiert.
RR actualitad 08:00