Siglir tar il cuntegn

Header

cuntegn

Chantun Paparazzi per ina saira

Els sa radunan al WEF a Tavau: prominenza da politica, economia e cultura. Survegnir ina fotografia ubain schizunt in selfie cun els n'è dentant betg simpel. Els han atgnas entradas, tramettan ils managers oravant e la security guarda che la glieud tegna distanza. Tuttina: Nus avain in selfie!

Crystal Awards

Avrir la box Serrar la box

Il Forum mundial d'economia ha surdà per la 23avla giada ils Crystal Awards, la distincziun ch'onurescha persunas prominentas che s'engaschan per in meglier mund. Tranter ils victurs dal 2017 tutgan la violinista tudestga Anne-Sophie Mutter, la chantadura columbiana Shakira e l'actur american Forest Whitaker.

Paparazzis n'essan nus insumma betg. Dentant avain nus empruvà dad esser paparazzis per ina saira. Tge stars che nus vulain avair davant la camera, quai era svelt decis: ils stars che han gudagnà il Crystal Award. Quai èn la chantadura Shakira e l’actur Forest Whitaker. Els dus èn ils stars ch'ins enconuscha dal radio ubain dal kino.

L’interess è grond. Emetturs da radio, televisiun e gasettas da tut il mund han spetgà ch'ils stars arrivan. Eternitads. Nus avain spetgà passa 45 minutas. La schurnalista da la Germania sper nus ha schizunt spetgà 90 minutas, e quai be cun pes bluts – ella na pudeva betg pli star sin ils chalzers schics cun in tatg da var 6 cm. Ella sa decida d'ir a mangiar insatge.

Sur 90 minutas sun jau vid spetgar sin Shakira e co. Igl è l’emprim di e tuttina hai jau gia mal ils pes dal spetgar…
Autur: Schurnalista Germania
 E lura sa drivan las portas ed ils stars straglischan èn la glisch dals apparats da fotografar e da las cameras da film.
Legenda: E lura s'avran las portas ed ils stars straglischan èn la glisch dals apparats da fotografar e da las cameras da film. RTR, Fabia Caduff

Pront è la schurnalista davent, s'avran las portas ed ils stars vegnan. Apaina èn Shakira, Forest Whitaker ensemen cun Anne-Sophie Mutter e Hilde Schwab entrads or da porta, suonda er in urizi da chametgs dal fotografar. La schurnalista tudestga curra natiers. Dentant èsi in curt urizi. Suenter ina minuta è tut passà. Tut il spetgar per quella minuta – e vis avain ils stars mo tras il telefonin e la camera da fotografar: Ma, il selfie, quel avain nus!

RR actualitad 08:00

Artitgels legids il pli savens