Siglir tar il cuntegn
Inhalt

Chantun Oz è l'ultim di dad Urs Cadruvi

Durant ils diesch onns sco secretari general da la Lia Rumantscha ha Urs Cadruvi lavurà vi da divers temas. Il fil cotschen è dentant stà la dispita tranter Pro Idioms e Pro Rumantsch e la via al cumpromiss tranter idioms e rumantsch grischun en scola.

Legende: Video Davos di da lavur dad Urs Cadruvi sco secretari general da la Lia Rumantscha abspielen. Laufzeit 02:55 Minuten.
Or da Telesguard dals 26.05.2017.

Construider da punts na vul Urs Cadruvi betg sa numnar. Era betg a la fin da ses temp d'uffizi sco secretari general da la Lia Rumantscha. Pli gugent sa vesa el sco commember d'ina squadra ch'ha lavurà mais ed onns vi dal cumpromiss, l'uschè numnà model da coexistenza.

Quel pretenda da scolaras e scolaras da scolas rumantschas ch'instrueschan l'idiom sco lingua d'alfabetisaziun d'emprender a leger e chapir il rumantsch grischun. En scolas ch'instrueschan il rumantsch grischun sco lingua d'alfabetisaziun vala il cuntrari.

Nus n'avain era oz betg la situaziun ideala.
Autur: Urs CadruviSecretari general Lia Rumantscha

E tuttina di Urs Cadruvi ch'el faschessi tut anc ina giada tuttina.

In cumpromiss filigran

La via a quest cumpromiss tranter Pro Idioms e Pro Rumantsch saja stada greva, conceda il secretari general partent. I haja dà bleras sairas ch'el na pudeva strusch pli discutar uschia ch'el saja simplamain cuntent ch'i saja gartegià da tegnair la perseveranza e la persistenza da tegnair tras.

Cun in sguard sin il cumpromiss per uschia dir la punt tranter ils adherents dals idioms ed ils adherents dal rumantsch grischun en scola di el:

La punt è enorm filigrana e sch'ins fravegia enturn mo in zic ristg'ins che la dispita rumpa ora puspè. E lura avain la medema salata sco tut quests onns.
Autur: Urs CadruviSecretari general Lia Rumantscha

Tant pli impurtant saja quai che la Lia Rumantscha cuntinueschi cun la filosofia da francar il model da coexistenza per ch'ina nova generaziun da rumantschs sappia crescher si cun quel.

Il rumantsch è daventà in

Guardond enavos al cumenzament da ses temp d'uffizi è ina chaussa clera: il renum dal rumantsch ha sa megliurà massivamain.

Jau sper che quai n'è betg mo in hype mabain ch'i dà in entir orcan or da quai.
Autur: Urs CadruviSecretari general Lia Rumantscha

I dat dentant era l'autra vart. Anc adina vegn il rumantsch gugent emblidà. Ed anc adina saja l'encletga per ils problems da la Rumantschia en il Grischun quasi inexistent, di Urs Cadruvi.

La lavur per la Lia Rumantscha cuntinuescha damai cun il nov secretari general Martin Gabriel. Urs Cadruvi mida il zercladur a Schiers e daventa vicedirectur da «la Fundaziun Flury».

RR actualitad 07:00