Siglir tar il cuntegn
Inhalt

Chantun Ordra da stalla per Martullo-Blocher

Per las elecziuns naziunalas da l'atun ha la Partida Populara Svizra dal Grischun decidì in’atgna regla interna. Quella dess tgunsch in avantatg a la candidata Magdalena Martullo-Blocher. Quai ha publitgà la «NZZ am Sonntag».

Magdalena Martullo-Blocher annunzia l'avrigl 2015 sia candidatura.
Legenda: La PPS grischuna sa stenta d’augmentar las schanzas da Magdalena Martullo-Blocher da vegnir elegida l’atun. Keystone

Quels candidats da la PPS per l’elecziun dal cussegl naziunal ils 18 d’october che fan las pli bleras vuschs duain valair sco elegids e betg exnum quels ch’èn sin la glista cun las pli bleras vuschs. Quai na correspunda betg al sistem da proporz. La regla interna saja, ch’in candidat u ina candidata che fiss elegì tenor sistem da proporz refusass sia elecziun a favur d’ina candidata u d’in candidat cun dapli vuschs da candidats, uschia la «NZZ am Sonntag».

Gia fatg il 2011

Questa «ordra da stalla» vegn en furma d’in palpiri ch’ils candidats da las duas glistas principalas da la PPS han suttascrit. Quai saja betg l’emprima giada che questa ordra vegnia en funcziun. Gia il 2011 hajan ins gì questa regla, uschia Valérie Favre Accola, candidata da Tavau envers la NZZ. Favre Accola è sin la glista «B» sin plazza dus suenter il president da la PPS Grischuna e top-candidat Heinz Brand.

Favre Accola stuess dar giu

La PPS va cun 4 glistas en il cumbat electoral per il Cussegl naziunal. La glista cun las pli grondas schanzas da gudagnar è la glista «B». L’autra glista cun schanzas è la glista «M» cun la candidata Magdalena Martullo Blocher sin l’emprim plaz.

I dat dus scenaris en ils quals «l’ordra da stalla» vegniss en funcziun:

  1. La glista «B» cun Brand e Favre Accola faschess marcantamain dapli vuschs che la glista «M» cun Martullo-Blocher. Lura fissan tgunsch elegids tenor proporz Brand e Favre Accola. Da quintar è dentant, che Martullo-Blocher fa dapli vuschs che Favre Accola. Ed uschia manglass la candidata da Tavau refusar sia elecziun en favur da Martullo-Blocher.

    Quest scenari gioga mo sche la PPS grischuna gudagnass dus sezs en il Cussegl naziunal.

  2. La glista «B» cun Brand fa dapli vuschs che la glista «M», Magdalena Martullo-Blocher fa dentant dapli vuschs che Heinz Brand. En quest scenari stuess alura il president da la partida grischuna e cusseglier naziunal en uffizi Brand dar giu ses post en favur da Magdalena Martullo-Blocher.

Preditgar auter ch’agir

Tenor la «NZZ am Sonntag» scurlattian las autras partidas burgaisas grischunas il chau da quai. Dad ina vart s’engaschia la PPS dad introducir il sistem da proporz per las elecziuns dal Cussegl grond, ma uss veglian ins cuntrafar a quel e favurisar Magdalena Martullo-Blocher ch’abita ordaifer dal chantun sur politichers chantunals che s’engaschian dapi onns per la politica grischuna.

Term ordra da stalla dal sport da motors

Il term ordra da stalla deriva dal sport da motors. Sche dus pilots da la medema squadra èn a la testa d’ina cursa, e sche quel cun pli paucas schanzas da gudagnar la stagiun fiss sin plazza in, sto el far plazza a l’auter per che lez possia gudagnar dapli puncts. Da la vart sanestra vegn in'autra critica: Quai saja ina mancanza da respect per reglas e per instituziuns democraticas, ha ditg il president dals Socialdemocrats Jon Pult sin dumonda da RTR.

RR Novitads 06:00