Atgnamain va quai uschia: La regenza formuleschan en ses program ils puncts da lavur sin ils quals ella vul metter accents. Ed onn per onn vegnan quels accents preschentads a las deputadas ed als deputads dal Cussegl grond che prendan els a la fin da la discussiun per enconuschientscha. Dentant magari vul insatgi anc plazzar in u l'auter giavisch – u cunzunt critica – cur ch'il programm vegn preschentà. Quella giada è quai stà Urs Marti, il deputà da la PLD e president da la citad da Cuira. El ha quasi fatg or da la discussiun dal program in'ura da dumondas.
Nua va la HTW?
Sias dumondas ha Urs Marti tschentà cur che la regenza ha preschentà ch'ella lessia finir la definiziun da la posiziun pertutgant in nov campus per la HTW, la Scola auta da tecnica ed economia. Quai saja er uras, uss spetgia el schon trais onns sin respostas. Per exempel lessia el savair sch'i saja planisà dad ir cun la HTW a Landquart ubain sch'il chantun haja cumprà l'areal Neumühle sut la staziun da Cuira per far in campus ordlunder. Martin Jäger, il directur d'educaziun, n'ha betg respundì. La regenza decidia pir la fin da l'onn 2017 tge varianta che saja la megliera, e gea, trais lieus a Cuira ed in lieu a Landquart vegnian examinads. Pertutgant l'areal Neumühle ha Mario Cavigelli dà resposta: Il chantun haja cumprà quel er sco pussaivel lieu per la HTW, sappia dentant er duvrar el per autras finamiras sche quai saja lura il cas.
Votums er per las scolas medias privatas
La PCD ha nizzegià la discussiun davart il program per exprimer sia malcuntentientscha pertutgant la finamira da la regenza – da laschar examinar las structuras da las scolas medias en il chantun cun in'expertisa giuridica. Tenor Gabriela Tomaschett saja quai «sco sche la regenza vuless cun l'expertisa giuridica ina stgisa per reducir la purschida da furmaziun en las regiuns sin in minimum.»