Siglir tar il cuntegn

Header

Navigaziun

ils 5 rins dal segn per olimpia
Legenda: Il comité olimpic internaziunal n'ha betg dumandà il Grischun Keystone
cuntegn

Chantun Olimpia 2026 - Innsbruck e betg Grischun

L'IOC è en tschertga da citads ubain regiuns che fissan prontas d'organisar ils gieus olimpics 2026. Il comité haja tranter auter dumandà Innsbruck sch'els avessan gust.

Tenor la gasetta «Tiroler Tageszeitung» ha il comité olimpic internaziunal dumandà la regiun dad Innsbruck sch'ella fiss pronta d'organisar ils gieus olimpics 2026. Il Grischun ch'è il mument vi da elavurar in concept per gieus olimpics n'ha anc udì nagut dal IOC.

Nagin problem per la candidatura dal Grischun

Tenor Andreas Wieland, il manader dal project per gieus olimpics en il Grischun, n'è quai nagin problem. Ch'els n'hajan survegnì nagin telefon dal IOC na saja nagin motiv per esser permalà. Els veglian cuntinuar cun lur lavur vi dal concept sco previs.

Dischinteress da l'IOC

Wieland na crai er betg che l'IOC saja dischinteressà d'organisar gieus olimpics en Svizra. Il comité sappia che las premissas per gieus olimpics en Svizra sajan pli che mo bunas e che la Svizra haja adina gì ina funcziun impurtanta per il sport d'enviern e per ils gieus olimpics.

Mez favrer è il concept sin maisa

Il concept per gieus olimpics en il Grischun vegnia preschentà mez favrer, ha Wieland agiuntà. Il tema gieus olimpics en il Grischun na saja anc ditg betg sut maisa.