Siglir tar il cuntegn
Inhalt

Chantun «Offeni Tür» - il telefon d'urgenza per purs cun quitads

L’Uniun purila grischuna ha drizzà en in telefon d’urgenza per puras e purs grischuns ch’èn ellas stretgas. Perquai ch'ils bains purils vegnan adina dapli sut squitsch duai il telefon esser en servetsch per problems e sfidas da las puras ed ils purs.

Ina pura che taglia in chaschiel.
Legenda: In mintgadi plain sfidas - far da pura u da pur en Grischun. RTR, Isabelle Jaeger

Dapi il december passà han ils purs e las puras grischunas la pussaivladad, da far diever dil telefon d’urgenza «Offeni Tür » da l’Uniun purila grischuna. Il servetsch, ch’è sumegliants al servetsch «Die dargebotene Hand» duai gidar a puras e purs en situaziuns cumplitgadas.

Tenor Martin Renner, maina fatschenta da l’Uniun purila grischuna, s'augmentia il squitsch sin ils bains purils adina pli fitg. Il pur haja ozendi dasper la lavur en stalla e sin il funs era da liquidar ina massa pensums administrativs e da resguardar in’entira retscha reglas e prescripziuns.

Problems e quitads da tuttas sorts

Martin Renner quinta, ch’ils quitads dils purs sajan fitg vasts e differents. Quai pon esser problems finanzialas, dispitas en famiglia u er il sentiment da betg pli dumagnar tut. Per el e ses team da cussegliaziun saja nagin problem memia pigns u banals.

Insumma saja il meglier da s’annunziar uschè baud sco pussaivel – avant che la situaziun saja memia cumplitgada. Uschia possian tut tenor gia intgins tips al telefon gidar. Da l'autra vart dal telefon èn puras e purs ch'han ina scolaziun da coaching.

«Offeni Tür» vegn duvrà

Quant savens che «Offeni Tür» vegni duvrà, n’ha Renner betg vulì tradir. El ha dentant pudì dir, ch’il telefon d’urgenza vegni duvrà e che las cifras en il chantun Grischun sajan sumegliantas a quellas d’auters chantuns che porschan in servetsch sumegliant.

En la branscha purila in pau in tabu

En autras branschas sco per exempel en la branscha da management tutgan coachings bunamain tar il mintgadi. En la branscha purila saja dumandar per agid dentant anc in zic in tabu, precisescha Renner.

RR actualitad 08:00

Telefon d'agid «Offeni Tür»

  • 081 254 20 14 è il nummer dal telefon d'urgenza.
  • Durant l’emna stattan ils coachs a disposiziun davent da las 08:00-09:00 e la saira da las 19:00-20:00. La fin d’emna san ins telefonar da las 19:00-20:00.
  • Il servetsch è gratuit.