Siglir tar il cuntegn

Header

Navigaziun

In maletg pitturà ed ina fotografia ord la medema vista
Legenda: Or dal cudesch «Wo die alten Meister standen» da Charly Bieler. MAD
cuntegn

Chantun Nua ch'ils vegls maisters stevan

650 viadis e passa 47’000 kilometers pli tard èsi uschè lunsch: Charly Bieler ha pudì preschentar il glindesdi cun ses nov cudesch «Wo die alten Meister standen. Gestern gemalt - heute fotografiert» in viadi pittoresc en il passà dal Grischun, da sias cuntradas e da ses vitgs.

Igl avess tanschì per in viadi enturn il mund: pertge durant quatter onns è Charly Bieler stà pli u main trasora en gir per l’entir Grischun enturn. Quai per far in viadi enavos en il temp, per avair gist la medema vista sco quai ch’ils vegls artists sco Segantini, Giacometti u Kirchner han gì, cura ch’els han malegià cun ieli sin taila la cuntrada ed ils vitgs gischuns.

Il resultat dals passa 47’000 kilometers ch’el ha fatg be cun il traffic public: quels mussa el en ses cudesch «Wo die alten Meister standen. Gestern gemalt - heute fotografiert». In viadi che n’è betg adina stà uschè simpel, sco Charly Bieler, fotograf e schurnalist da professiun, manegia: «Jau hai adina stuì dumandar la glieud nua ch’jau chat il motiv ed il lieu nua che l’artist ha malegià quel.»

Cun agid da «Dieu» ...

Mintgatant haja el era pudì s’orientar vi dal clutger da la baselgia. Dentant sajan quai plitost stadas las excepziuns. E natiralmain ha el era fatg plirs viadis el medem territori, per la fin finala chattar il dretg lieu. Uschia per exempel en la Val Medel nua ch’el è stà tschintg giadas, fin ch’el ha chattà il dretg lieu nua che Johann Ludwig Bleuler ha malegià en il 19avel tschientaner la chaplutta dad Acla. «L’anteriur avat da la claustra da Mustér ha gidà mai, la fin finala», di Charly Bieler.

... u dals vegls

E sch’i na saja ina giada betg l’avat, lura haja quai per il pli adina dà in indigen che haja pudì gidar el. «En ils vitgs ha quai adina puspè dà umens vegls, enturn 80 onns, che sesevan sin in banc. E quels han savì fitg bleras chaussas ed han savens era pudì gidar», concluda Bieler.

300 viadis per il giat

Bun la mesadad da ses 650 viadis ch'el ha fatg èn la finala stads in success. Quai la vista positiva. La vista negativa fiss: prest 300 da ses viadis èn stads per il giat, perquai ch’el n'ha betg chattà il lieu u il motiv dals maletgs dals artists.

Uschè fit sco dapi la RS betg pli

E tuttina, profità haja el adina pudì durant quests quatter onns ch'el ha lavurà vi dal cudesch. I na dependa betg sch’el haja gì success cun chattar il lieu u betg. Betg mo pervia dals inscunters cun la glieud e ch’el saja stà bler en gir ed haja emprendì d’enconuscher il Grischun d’ina nova vart. Mabain ch’el saja era stà fitg fit suenter tants viadis. «Uschè fit sco lura, na sun jau betg pli stà dapi la RS», di Bieler.

RR actualitad 17:00