Sco la regenza scriva en ina communicaziun, adempleschia il concept inoltrà da la scolina Rudolf Steiner tant las prescripziuns da la lescha da scola pertutgant l'instrucziun sco er las disposiziuns chantunalas concernent las mesiras da la pedagogia speziala. La permissiun da manar ina scola privata vegn concedida cun la resalva ch'i vegnia communitgà a l'inspecturat da scola fin ils 31 da matg 2018 il lieu da la scolina e fin il pli tard ils 15 da zercladur 2018 ils uraris concrets per l'onn da scola 2018/19.
Lubientscha per scola da talents
En vista a la midada tar il plan d’instrucziun 21 ston tut las classas da talents existentas midar lur dumber da lecziuns e dumandar l’Uffizi chantunal per la scola populara ed il sport per ina lubientscha speziala. Sco il chantun scriva survegnan las scolas da talents a San Murezzan, Glion, Cuira e Tavau ina lubientscha per adattar lur uraris per l’onn 2018/2019.
Grondas midadas na datti però betg. Era tar las scolas da talents vegn informatica e medias pli preschent en il plan d'instrucziun. Plinavant dastgan emnas cumpactas era vegnir organisadas nov durant il temp da scola. Enfin uss eran quellas be lubidas durant il temp da vacanzas.
Cumbinar emprendissadi cun sport da prestaziun
La regenza ha concludì da cuntinuar cun il post directiv «furmaziun professiunala e sport da prestaziun» sco purschida permanenta da l'Uffizi per la furmaziun professiunala (UCFP). Ins vul promover vinavant sportistas e sportists giuvens talentads da far dasper la carriera sportiva era in emprendissadi. Gia dapi il 2009 datti in post directiv sco project terminà fin la fin d’avust 2018. Quest post vegn uss midà en ina purschida permanenta, communitgescha la regenza. Las experientschas fatgas fin uss hajan mussà che la purschida saja sa cumprovada e ch’ella correspundia era al basegn da las sportistas ed ils sportists giuvens.
RR novitads 09:00