Siglir tar il cuntegn
Inhalt

Chantun Nova gasetta grischuna - grheute.ch

Dapi gliendisdi datti en il Grischun ina nova gasetta online cun il num «GR heute». Il chau davos la gasetta è Mathias Braendli. El ha gia lavurà tar il Bündner Tagblatt, tar Radio Grischa e tar 20 minutas. Uss maina el la partiziun marketing da la IBW e fa dasperas la gasetta online "grheute.ch".

gasetta online
Legenda: La nova gasetta grischuna ch'i dat en la rait. mad

Fundà la gasetta ha Braendli perquai ch'el è dal meini, che la Somedia haja in monopol da gasettas quotidianas en il Grischun.

In monopol n'è betg bun per ina societad.
Autur: Mathias Braendlichau da grheute.ch

La gasetta vul esser independenta, purtar novitads dal Grischun e commentar ed analisar temas regiunals. Quai èn las finamiras ch'el less cuntanscher ensemen cun ses team da var 15 persunas. Braendli è conscient, ch'el na po betg cuvrir l'entir Grischun cun uschè paucas persunas che lavuran be parzialmain. Dentant vul el tuttina, che «grheute.ch» vegnia percepì sco ina gasetta integrala en il chantun.

Finanziada vegn la gasetta anc ord l'agen satg. Pli tard less Braendli vender inserats per finanziar la gasetta.