L'iniziativa che vul abolir taxas da radio e televisiun, numnada curt «No Billag», tutgass en il Grischun betg sulet RTR, RSI e las parts da SRF, mabain er la chasa da medias Somedia. La Somedia producescha tant products da print sco las gasettas «Südostschweiz», il «Bündner Tagblatt» e la «Quotidiana», sco er ina purschida online, «Radio Südostschweiz» e «Tele Südostschweiz». Or dal pot da taxas survegn la Somedia radund 7 milliuns francs. La «Tele Südostschweiz» vegn finanziada per 70 pertschient da quellas taxas, il «Radio Südostschweiz» per bun la mesadad. «Senza quels daners, na fiss quai betg pli pussaivel dad emetter», di Andrea Masüger, il CEO da la Somedia.
I na dat nagin plan B
Er in program reducì na fiss betg pussaivel da far cun ina mancanza da daners tant gronda: «Lura stuvessan nus reducir uschè fitg, che nus pudessan forsa anc far in'ura program per di, e quai n'è betg pli attractiv», di Masüger. Ed er subvenziunar RSO e TSO a travers, entras autras spartas da la Somedia saja betg realistic: «Nus na pudain betg prender 7 milliuns francs da zanua auter.»
In cler «Na» er da la PCD
Il referat d'Andrea Masüger è stà il mardi saira ina part dal program da la radunanza da delegads da la PCD, ch'ha gì da decider davart l'iniziativa «No-Billag». Tschiffar quella parola n'haja betg chaschunà grondas discussiuns. La votaziun e la pli gronda part dals delegads sajan cleramain stads per refusar l'iniziativa.
RR actualitad 07:00