La prognosa dal glaziolog da l’ETH a Turitg, dr. Matthias Huss, ha manà avant in'emna a letras grossas grossas en l’entira Europa. En 100 onns vegnan 80% enfin 90% dals glatschers en Svizra ad esser svanids. Motiv è il clima che vegn adina pli chaud.
Pertutgads da la digren dals glatschers èn principalmain trais secturs:
Turissem
Glatschers èn magnets per turists e pussibiliteschan ad intginas pendicularas in manaschi da bunamain 360 dis.
Provediment d’aua
Glatschers èn impurtants regulaturs d’aua. Regian temperaturas fitg chaudas, lieua il glatscher e furnescha aua. Sch’i dat plievgia arcuna il glatscher aua en furma da naiv. Datti en il futur pli paucs glatschers, è la consequenza ch'i dat pauca aua durant periodas da chalira.
Crudada da crappa
La massa da glatsch e naiv tegna ensemen la muntogna. N'è quai betg pli il cas, datti dapli crudadas da crappa. In ulteriur privel per alpinists e viandants.
Tut questas consequenzas na fan però betg nunpussaivla ina vita en las muntognas. Tenor dr. Matthias Huss sa tracti da facturs ch’ins po influenzar. Tuttina, entras la sperdita da glatschers va era a perder in simbol d’identificaziun per la populaziun en las Alps.
RR actualitad 07:00