Naiv fin giu sin 1000 meters sur mar

Cun la bell'aura èsi ì a fin la gievgia saira. Ina front d'aria fraida cuntanscha la Svizra e maina en il Grischun naiv fin giu sin 1000 fin 1300 meters sur mar.

In arber d'atun cun naiv.

Legenda da maletgs: Igl è da far quint cun naiv fin 1000 meters sur mar. Keystone

La gievgia suentermezdi devi anc bunamain dapertut en Svizra sulegl – en Grischun cun temperaturas da fin 20° a Cuira e 17° en l'Engiadina. La saira hai lura cumenzà a plover en il Grischun Central, la Surselva ed en il nord dal chantun. Il cunfin da naiv è sa sbassà sin 2000 fin 1500 meters sur mar.

Venderdi quintan ils meteorologs cun aura variada cun periodas da sulegl, però er cun plievgia e naiv. Il cunfin da naiv sa sbassa vinavant, sin 1300 fin 1000 meters e las temperaturas sin 10° fin 13°. Sin 2000 meters èsi enturn 1°.

En l'Engiadina ed en la Val Müstair n'èsi betg uschè fraid: La notg passada è il cunfin da naiv sa sbassà sin 2000 fin 1600 meters – ed i resta nivlus.

RR actualitad 06:00++