Siglir tar il cuntegn

Header

audio
Fradaglia e naiv betg optimal per puma en Grischun
Or da Actualitad dals 07.04.2021.
laschar ir. Durada: 02:56 minutas.
cuntegn

Naiv e fraid Privel è grond ch'i dat donns tar puma

Las fradaglias e la naiv frainan l'entira natira suenter ch'igl è stà miaivel. Cunzunt tar la puma èsi da quintar cun donns. Las vignas han dentant gì cletg, ellas n'han anc betg chatschà.

Suenter ch'igl è stà miaivel las davosas emnas han blers pumers gia flurì. Perquai èsi er da quintar cun donns, gist tar las plantas d'apricosas ch'èn gia vegnidas fructifitgadas, ellas na pon perquai betg pli vertir temperaturas uschè fraidas, quai di Marco Frey ch'è responsabel per la puma tar il Plantahof.

L'aura chaschuna propi notgs senza sien. Igl è propi tupp'aura.
Autur: Marco Freyresponsabel per puma, Plantahof

Las plantas da tschareschas, maila e paira pon entant anc vertir temperaturas da radund minus 4 grads, uschè fraid na saja quai enfin uss anc betg stà. I saja dentant da guardar tge che capita las proximas notgs. Sch'igl ha dà donns e quant gronds che quels èn na saja perquai anc betg pussaivel da dir uschia Marco Frey.

Vignas n'han anc betg chatschà

Dapli cletg han las vignas gì. Quellas n'han anc betg chatschà uschia ch'il fraid e la naiv na pon betg far donns, uschia Walter Fromm il cumissari da viticultura dal Plantahof. I saja bun ch'i haja adina puspè dà periodas pli fraidas tranter las chaudas, uschia che las vignas n'han betg pudì chatschar.

Sch'jau pudess giavischar fissi bun sch'i vegniss chaud mez avrigl per che las vignas pon chatschar.
Autur: Walter Frommcumissari da viticultura, Plantahof

Uschia sajan ins en la media dals davos 20 onns suenter che las vignas han chatschà ils davos onns fitg baud pervia da las primavairas chaudas. Che las vignas èn quai onn puspè pli tard vidlonder saja bun manegia Walter Fromm. Uschia saja er la vendemia pli tard ed il vin daventia lura pli aromatic.

RTR actualitad 12:00

Artitgels legids il pli savens

Scrollar a sanestra Scrollar a dretga