Naginas prognosas co il dumber da fugitivs vegn a sa sviluppar

Ils fugitivs èn in tema actual che fatschenta era las deputadas ed ils deputads ed è uschia era vegni discutà en l'ura da dumondas dal Cussegl grond. Il deputà Reto Crameri da la PCD ha vulì savair da la regenza, cun quants fugitivs che quai saja da quintar quest onn.

La resposta ha cusseglier guvernativ Christian Rathgeb dà. I na saja per il mument betg pussaivel da far ina prognosa lianta pertutgant dumondas d'asil. Il secretariat da stadi per migraziun quinta dentant, ch'i vegnia quest onn minimum tuttina blers fugitivs sco l'onn passà, quai fiss per la Svizra radund 40 000 fugitivs.

Ina situaziun che pudess probabel era dar consequenzas per il Grischun, è sch’il pass dal Brenner en l’Austria vegniss serrà, ha ditg Rathgeb en l’ura da dumondas dal Cussegl grond. Alura stuessan ils fugitivs mirar per ina nova ruta e lura fissan surtut ils chantuns en il sid da la Svizra pertutgads d’in augment da las dumondas d’asil, ma er cun dapli fugitivs sin via envers la Germania. Sco Rathgeb ha ditg fissan surtut ils chantuns Tessin, Vallais ma er il Grischun pertutgads.

RR Actualitad 12:00