Naginas pretaisas minimalas en RG per scolas idiomaticas

La Lia Rumantscha propona co realisar il model da coexistenza en il plan d'instrucziun 21. Per scolas ch'instrueschan en l'idiom na duai quai dar naginas pretaisas minimalas en Rumantsch grischun. En il stgalim superiur duai però vegnir pretendì enconuschientschas passivas en RG.

Ils scolars da las scolas idiomaticas duain vegnir confruntads cun Rumantsch Grischun pir en il stgalim superiur.

Legenda da maletgs: Ils scolars da las scolas idiomaticas duain pir en il stgalim superiur vegnir confruntads cun Rumantsch Grischun. Keystone

Quai scriva la Lia Rumantscha en ina brev a la regenza grischuna. Sche lezza va da principi d’accord cun il model proponì da la Lia, n’è dentant betg anc cler. L’emprim stoppia quel anc vegnir tractà, ha ditg il cusseglier guvernativ, Martin Jäger. Quant ditg che quai cuzzia, na possia el dentant betg dir.

«  Sche quai resta uss tar la proposta da la Lia, fissan nus buns per amur da la pasch d'acceptar. »

Domenic Toutsch
Pro Idioms Engiadina

La Pro Idioms va d'accord cun la proposta da la Lia Rumantscha per uschia «salvar la pasch linguistica», ha ditg Domenic Toutsch da la Pro Idioms Engiadina. El è dentant da l'avis che quellas enconuschientschas passivas en il stgalim superiur na portian nagut als rumantschs.

«  Il problem da questa proposta è ch'ella cuntegna absolutamain naginas pretensiuns, gnanc minimalas concernent il rumantsch grischun. »

Bernard Cathomas
grond aderent dal RG

La Pro Rumantsch n'è betg cuntenta

Betg cuntents cun la proposta da la Lia èn però represchentants da la Pro Rumantsch. Per Bernard Cathomas per exempel n'è quai nagina schliaziun per l'avegnir. I dovria in plaz fix per il RG en l'instrucziun. Ed i dovria in obligatori cun finamiras cleras.

«Il problem da questa proposta è ch'ella cuntegna absolutamain naginas pretensiuns, gnac minimalas concernent il rumantsch grischun», di Cathomas. I dettia naginas cumpetenzas che stoppian vegnir ademplidas e naginas controllas. «Uschia ch'igl è pli u main ina licenza per far nagut, sch'ins na vul far nagut», manegia Cathomas. La Lia haja dà suenter dal tuttafatg a la Pro Idioms cun questa proposta.

In bun cumpromiss per la Lia

La Lia vesa quai dentant auter: la Pro Idioms haja la tenuta dad insumma sclauder il rumantsch grischun en la scola idiomatica. E quai na saja ussa gea betg il cas cun la proposta. Tenor la Lia è il cumpromiss in bun cumpromiss. E quai malgrà che betg tuts èn cuntents cun el.

I saja in bun cumpromiss, perquai ch'el tegnia quint a quai che saja pussaivel en scola e quai ch'ins veglia cuntanscher cun il rumantsch grischun. Numnadamain che tut ils scolars che van en la scola populara chapeschian rumantsch grischun.