Siglir tar il cuntegn

Header

Navigaziun

Legenda: Guardar il video Il chantun noda in minus da 51,5 milliuns francs. Durada 02:18 minutas.
Or da Telesguard dals 15.03.2017.
cuntegn

Chantun Nagina surpraisa: in minus da 51,5 milliuns francs per il chantun

Ils custs finanzials extraordinaris muntan a 67,9 milliuns francs. Il resultat operativ serra cun in plus da 16,4 miliuns francs. Il resultat total serra sco budgetà cun in deficit da 51,5 milliuns francs.

Legenda:
Cumparegliaziun da budget e quint dal chantun Grischun
  • resultat operativ: 16,4 milliuns francs (2015: 59,8 milliuns francs)
  • resultat total: -51,5 milliuns francs (2015: 16,7 milliuns francs)
  • entradas fiscalas: 751,8 milliuns francs (2015: 744,2 milliuns francs)
  • resultat dal quint da las vias: -8,5 milliuns francs (2015: 3,4 milliuns francs)
  • investiziuns nettas: 207,2 milliuns francs (2015: 163,3 milliuns francs)

Resultat operativ

Quest resultat operativ positiv saja surtut d'attribuir al fatg ch'in haja dà ora marcantamain damain daners che budgetà e gì dapli entradas. Quai communitgescha il Departament da finanzas. Cumpareglià cun l'onn avant è quai però in minus da 43,4 milliuns fracs. Questa reducziun saja da declerar sco suonda:

  1. L'onn 2016 ha la Banca naziunala svizra fatg ina distribuziun ordinaria da la quota da gudogn, l'onn avant avevi dà ina distribuziun dubla (-16,1 milliuns francs).
  2. L'onn 2016 ha il chantun survegnì 17,3 milliuns francs main pajaments da gulivaziun da la gulivaziun federala da finanzas (NGF).
  3. La nova gulivaziun da finanzas dal Grischun è entrada en vigur l'onn 2016 ed ha engrevgià il resultat cun stgars 15 milliuns francs.
  4. Pervia da la producziun pli bassa l'onn 2016 hai dà main tschains d'aua (-9,1 milliuns francs).

Resultat extraordinari

Ils custs finanzials extraordinaris nets importan 67,9 milliuns francs. Quels èn resultads pervia da las grondas fluctuaziuns dals curs da las investiziuns finanzialas, uschia ch’il chantun ha stuì far rectificaziuns cumplessivas da las valurs.

Resultat total sco budgetà

Il resultat total sco summa dal resultat operativ e dal resultat extraordinari correspunda al deficit budgetà da var 51 milliuns francs. Suenter avair cudeschà la perdita annuala e resguardond las retenziuns ch'èn vegnidas schliadas per obligaziuns da contribuziun pendentas importa l'agen chapital cumprovà 2298 milliuns francs. La gronda part da quel è liada en l'infrastructura ch'è necessaria per il manaschi sco er en finanziaziuns spezialas ed en reservas. L'agen chapital che stat a libra disposiziun munta circa a 345 milliuns francs.

Vias

La finanziaziun speziala «vias» serra cun in surpli d'expensas da 8,5 milliuns francs (preventiv: 19,9 milliuns francs). Las expensas totalas sa chattan cun 327,5 milliuns francs sin il nivel da l'onn precedent (328,4 milliuns francs). Il dabun da las vias è per la fin da l'onn 2016 sin il maximum legal da 100 milliuns francs.

Prognosas 2017

Per l'onn current spetga la regenza almain in resultat gulivà. Budgetà è in deficit da 20 milliuns francs. Per tegnair en equiliber las finanzas chantunalas er a pli lunga vista persequitescha la regenza ina politica da finanzas tenor prioritads severas. Dentant gia davent da l'onn 2020 vegn quai pli stretg, il chantun sto lura far quint cun pli paucas entradas. Quai perquai che quai dat novas reglas per ils tschains da l'aua ubain er in nov project empè da l'USRIII sco er midaments tar l'egualisaziun da finazas.

RR novitads 10:00