Siglir tar il cuntegn

Chantun Nagin tact da mes'ura dal tren tranter Cuira e Casti

Il deputà cristiandemocrat, Roland Kunfermann da Tusaun, ha pretendì en in'incumbensa a la regenza d'examinar questa pussaivladad. Malgrà sustegn da plirs deputads e deputadas n'hai la finala betg tanschì per surdar l'incumbensa a la regenza.

il deputà Roland Kunfermann en il cussegl grond
Legenda: L'incumbensa da Roland Kunfermann per in tact da tren da mes'ura tranter Cuira e Casti ha fatg naufragi. RTR, M. Decurtins

Il Cussegl grond ha refusà l'incumbensa da Roland Kunfermann cun 54 cunter 48 vuschs. Tenor cusseglier guvernativ Mario Cavigelli na dettia lingias da tren betg simplamain sin giavisch ed empustaziun.

Qua n'han ils arguments dal deputà Reoland Kunfermann betg gidà che ha punctuà l'impurtanza dal Grischun central, tranter auter er pervi da novs objects sco la praschun da Realta.

Kunfermann vul dentant cumbatter vinavant per il tact da mesura sin la lingia tranter Cuira e Casti. Er sche quai dovra tut tenor bler pazienza perquai che novas lingias da tren vegnan planisadas a fitg lunga vista. Il termin per inoltrar giavischs p. ex. per l'onn 2030 è gia scadì avant mez onn.