Siglir tar il cuntegn
Inhalt

Chantun Nagin secret da banca en la Constituziun

Il Cussegl dals chantuns ha decis da betg francar il secret da banca en la Constituziun. Ils dus cussegliers dal chantun Grischun eran tar la debatta da different opiniun.

Il Cussegl dals chantuns en ina debatta.
Legenda: Il Cussegl dals chantuns en ina debatta. Keystone

Il secret da banca na duai betg vegnir francà en la Constituziun. Il Cussegl dals chantuns refusescha in’iniziativa dal pievel correspundenta. Era «na» di el a la cuntraproposta dal Cussegl naziunal.

Uschia suonda il Cussegl dals chantuns l’argumentaziun dal Cussegl federal. Tenor lez fissi cun l’iniziativa betg pli pussaivel dad imponer la taglia a moda correcta. L’ultim pled vegn probabel il pievel svizzer ad avair.

Il secret da banca sparta Engler e Schmid

Dapi il cumenzament da l’onn vala per ils clients da bancas svizras che vivan en l’exteriur il barat d'infurmaziuns automatic. Vul dir che lur datas da banca, per exempel la summa dals daners ch'els han tar ina banca svizra, vegnan tramess automaticamain a las autoritads da taglia da lur patria.

Per ils Svizzers che han lur contos en Svizra resta dentant tut sco enfin uss: Lur datas èn protegidas. Per che quai restia er en l'avegnir uschia, vul in'iniziativa francar il secret da banca en la Constituziun federala.

En il parlament federal na chatta quest plan dentant betg bler sustegn. Ils adherents emprovan perquai da salvar ils puncts centrals da l'iniziativa cun ina cuntraproposta.

Lur arguments

Per il cusseglier dals chantuns Martin Schmid (GR/PLD) va l’iniziativa memia lunsch. Ella mettessia en dumonda il sistem cumprovà en Svizra. La cuntraproposta segireschia dentant tant la pratica actuala en dumondas da taglia, sco er las datas ed infurmaziuns persunalas da mintgin, di Martin Schmid envers Radiotelevisiun Svizra Rumantscha.

Er Stefan Engler (GR/PCD) è da l’avis ch’i valia da proteger las datas persunalas. Percunter na dettia quai nagina giustificaziun da proteger cun la cuntraproposta era anc il fraud da taglias ubain in cumportament incorrect a disfavur dal stadi e da quels ch’ageschan correctamain. Mo gist quai saja la finamira centrala da la cuntraproposta, crititgescha Engler.

Chombra pitschna decida cunter iniziativa e cuntraproposta

Suenter ina lunga ed intensiva debatta ha la maioritad dal Cussegl dals chantuns decidì da cussegliar a las votantas ed als votants da dir na a l’iniziativa dal pievel per la protecziun da la sfera privata. Ultra da quai han els decidì cun 25 cunter 19 vuschs da betg preschentar ina cuntraproposta a l’iniziativa. Omaduas fatschentas turnan en il Cussegl naziunal. Lez aveva ditg gea a la cuntraproposta.

RR actualitad 17:00+

Iniziativa ed iniziants

Davos l’iniziativa «Gea a la protecziun da la sfera privata» stattan represchentants da la PPS, PLD, PCD, la Lega ed ils Giuvens liberals. Ils iniziants han però era signalisà da pudair s'imaginar da retrair l’iniziativa, sche la cuntraproposta chattassia ina maioritad en il parlament.