Siglir tar il cuntegn
cuntegn

Chantun Nagin «Calandaplätzli» or dal «Calandagärtli»

La citad da Cuira vul renovar il curtin dal Restaurant Calanda. I duai dar novas plantas ed il mir duai vegnir davent. L’ustiera dal Calanda n'ha dentant betg grond gust da quels midaments ed ha perquai fatg ina petiziun. Entant ha ella rimnà passa 2'000 suttascripziuns.

Purtret dal plaz posta a Cuira.
Legenda: La visualisaziun mussa co il curtin dal Calanda duai vesair ora suenter la renovaziun. MAD

Tar il nov curtin dal «Restaurant Calanda» datti trais craps da scarpitsch. La petiziun vul mantegnair il mir, las plantas e l’atmosfera.

Il mir dovri per proteger

Tenor la nova planisaziun da la citad da Cuira na datti pli nagin mir enturn il curtin dal Calanda. L’ustiera vul però era en l'avegnir in mir enturn il curtin. Tom Leibundgut è dentant surprais ch'il mir è tuttenina in tema da discussiun. «In giavisch da Sandra Brunner era d'engrondir il curtin dal Calanda. Quai è mo pussibel sche nus prendin davent il mir e faschain ina plazza averta.»

Perquai ch'il curtin sa chatta tranter duas vias dat il mir segirtad a noss giasts. Ed era dat il mir in rom al curtin che procura per l’atmosfera.
Autur: Sandra BrunnerUstiera dal «Restaurant Calanda»

Las plantas dovri per dar sumbriva

Las plantas en il curtin vegnan midadas ora tenor la nova planisaziun. Sandra Brunner vul però mantegnair las plantas en il curtin dal Calanda. «Las 6 plantas èn anc frestgas e saunas e dattan sumbriva da stad». Tom Leibundgut manaja dentant che per renovar il funds ston las plantas vegnir remplazzadas. «Las plantas na vegnan betg terradas. Nus stuain metter ellas simplamain en in auter lieu perquai che las ragischs èn massa grossas e grondas.»

Purtret da l'usteria Calanda a Cuira.
Legenda: Uschia guarda il curtin dal Calanda ora ussa. Il mir e las plantas duain svanir. RTR/Lea Livers

Il Calanda sco lieu tradiziunal

Cun mantegnair il mir e las plantas vul Sandra Brunner era mantegnair l’atmosfera dal curtin dal Calanda. «Tuts enconuschan il curtin sco lieu tradiziunal.» Per Tom Leibundgut èsi dentant cler che betg la citad è responsabla per l’atmosfera, mabain l’ustiera.

Cun l’indriz dal curtin duai Sandra Brunner mantegnair l’atmosfera sco ella vul. E cul indriz sa ella pervi da mai era far puspè in mir per exempel cun fluras.
Autur: Tom LeibundgutSuprastant da la citad Cuira, Responsabel per il nov curtin

Entant ha l’ustiera dal Calanda, Sandra Brunner pudì ramassar passa 2'000 suttascripziuns per la petiziun.

RR actualitad 07:00