Ils dirigents rumantschs al SKJF Christian Klucker, Rilana Cadruvi Scherrer e Flavia Walder èn stads trumpads, ch’il rumantsch è vegnì negligì dal tut durant il SKJF a Lugano.
Flavia Walder è schizunt intervegnida tar il secretariat suenter ch’il program dal SKJF era squitschà: En quel è sulettamain il salid dal directur general da la SRG SSR, Roger de Weck, translatà per rumantsch. Tut il rest datti mo per talian, tudestg e franzos.
Capacitads persunalas e colorit local – nagin surprenda la responsabladad
Tenor Fulvio Caccia, il president dal comité d’organisaziun dal SKJF a Lugano, n'haja el simplamain betg gì las capacitads persunalas e finanzialas per las translaziuns rumantschas. Tenor el avess l’uniun tetgala dal SKJF gì da finanziar questas translaziuns.
Vreni Winzeler, la presidenta da l’uniun SKJF, na prenda betg encunter questa renfatscha. L’uniun tetgala na saja sapientivamain betg sa maschadada en ils fatgs dal comité d’organisaziun da Lugano. La lingua tutgi tar il colorit local dal SKJF. Avant dus onns a Mustér haja il rumantsch gì ina gronda muntada durant il SKJF. A Lugano saja il focus linguistic sin il talian.
Proxim SKJF a Lucerna era per rumantsch
Curaschi ch’il rumantsch saja puspè pli preschents al proxim SKJF l’onn 2019 han ils organisaturs gia fatg cun lur reclama. Durant che differents chors dal chantun Lucerna han chantà en dialect tudestg svizzer, èn ils pleds vegnids projectads sin ina tenda per talian, rumantsch e franzos – en questa successiun.
RR actualitad 12:06
