Siglir tar il cuntegn
Inhalt

Chantun Nadal senza naiv: Per quest onn pauca speranza «alva»

Pastgiras verdas e spundas brinas enstagl cuntradas d’enviern da siemi; bunamain en l’entir chantun manca la naiv. Ed era las prognosas per ils proxims dis n’empermettan betg meglierament.

Legende: Audio Bunura: Gian Darms (slf) davart la situaziun da naiv en detagl abspielen. Laufzeit 04:42 Minuten.
04:42 min, Actualitad dals 21.12.2015.

I smanatscha in temps da Nadal e Bumaun senza naiv. In temps ch’è d’enorma impurtanza per las destinaziuns turisticas en il Grischun. En l’entir Grischun èsi quasi anc verd il mument. La naiv lascha spetgar; e pli ditg che la naiv lascha spetgar e pli fitg ch'ins sa damonda: «Cura vegn la naiv finalmain?»

Las prognosas

Ina dumonda che Nina Levy, la «Nina da l’aura», co ella vegn era numnada a Sedrun, na sa era betg dir precis. La natira ha tenor ella dentant gia fatg la prognosa. Ella persequitescha gia durant la stad exact tge che la natira fa.

I vegn en mintga cas a dar in bun enviern cun blera naiv.
Autur: Nina Levy«Wetterschmöckerin»

Ella mira sin ils tieus, sche quels han schon pers bleras guglias. Ella mira era sin ils furmiclers: pli gronds che quels èn, e pli blera naiv ch'i dat. Ed in bun indicatur è tenor Nina Levy era las talpas. Pli activas che quellas èn, e pli sever che l’enviern vegn. E ses facit è: «I vegn a dar in bun enviern cun blera naiv.»

Pli precis crai Jan Eitel da SRF Meteo da savair dir cura che la naiv vegn, respectiv fin cura ch’ella na vegn segir betg. Ils ultims dis dal 2015 fai tenor il meteorolog ina giada dapli bell’aura. Era las temperaturas sajan pulit miaivlas per il december.

Fin Nadal na datti nagina naiv. Ils dis fin Silvester na portan era betg ina cuvrida.
Autur: Jan EitelSRF Meteo

Auter vesa quai dentant ora per l’onn nov: quel para da cumenzar bain per quels che spetgan gia vess sin la naiv. «Tenor las prognosas actualas èn las schanzas en mintga cas bunas, ch’i dat al l’entschatta dal 2016 naiv», di Jan Eitel, il meteorolog da SRF. Con blera naiv ch’i dettia lura era propi, na sappian ins dentant anc betg dir.

Pertge prognosas a lunga vista, sajan adina da giudair cun attenziun. Ils models da mesiraziun giajan pulit in ord l’auter: vul dir davent da fitg blera naiv a fitg pauca naiv.

RR Actualitad bunura, 06:00