Siglir tar il cuntegn

Chantun Mustga «Suzukii» fa donns sco anc mai

Il 2009 han ins registrà l’emprima giada la Drosofila Suzukii. La mustga asiatica ch'è parenta cun la mustga da fritgs indigena. Auter che la mustga indigena fa la mustga estra gronds donns a las racoltas da fritgs e vins.

Il mustgin Drosofila Suzukii daventa quest on in problem remartgabels per ils viticulturs e pomiculturs indigens. Quai conferma era Hans Jüstrich dal Plantahof. L‘uffizi spezialisà s’occupa gia plirs onns cun il mustgin che vegn oriundamain da l’Asia. Uschè bleras Drosofilas Suzukii sco quest onn n'hajan els dentant anc mai registrà.

Legende: Video Il mustgin «Suzukii» fa donn als viticulturs abspielen. Laufzeit 03:36 Minuten.
Or da RTR dals 09.10.2014.

Flexibla – sperta – fritgaivla

Dapi che Drosofila Suzukii è arrivada - probablamain entras in transport d’import en Europa - na pon ins betg pli tegnair si ella. Uschè è ella arivada entaifer dus onns da la riva da la Spagna enfin èn Svizra. Quai era il 2009. Dapi lura è ella sa derasada en quasi tut las valladas.

La mustga è numnadamain fitg flexibla e sa adatta spert a temperaturas e clima. En pli n'è ella betg spezialisada sin in fritg specific, mabain va sin tut la fritga cotschna. In’auter aspect che ha pussibilità a la mustga da sa derasar uschè spert è il fatg ch’ella po sgular cul vent enfin 20 kilometers per di. Ed anc in fatg ulteriur: La femna fa entaifer sia curta vita (fin 30 dis) 400 ovs.

Uffizi federal d’agricultura lubescha dapli insecticids

L’Uffizi federal d’agricultura ha uss reagì e lubescha als viticulturs d’intensivar lur cumbat cunter il mustgin.

Uschia pon ils viticulturs duvrar l’insecticid «spinosad» trais giadas enstagl da duas giadas sco fin ussa. Premissa è che la quantitad da l'insecticid vegnia reducida per giada ch'i vegnia fatg diever d'el, scriva l’uffizi. Las vignas èn uschia protegidas pli ditg da donns. L'insecticid «spinosad» è lubì er per la producziun biologica.

RR actualitad saira 17:00