Siglir tar il cuntegn

Chantun Museum d'art cun marcant dapli visitaders

L'interess vi dal Museum d'art dal Grischun a Cuira è creschì fermamain cun il nov bajetg. Durant l'emprim entir onn da gestiun ha il dumber da visitaders bunamain pudì vegnir redublà.

Museum d'art Grischun.
Legenda: Museum d'art Grischun. Keystone

Durant l'emprim entir onn da gestiun ha il bajetg nov dal Museum d’art dal Grischun purtà bunamain il dubel da visitaders. Cun 47’000 visitaders, 240 visitas guidadas e 56 occurenzas sajan las aspectativas vegnidas ademplidas, scriva il co-directur Stefan Kunz en il rapport annual ch'è cumparì il mardi.

Enconuschent sur ils cunfins dal chantun ora

Magnets per il public sajan stads surtut nums sco Angelika Kaufmann, Giovanni Segantini ubain Giovanni ed Alberto Giacometti. Il bajetg nov dal museum è vegnì inaugurà avant dus onns ed ha custà 28 milliuns francs. Per ils planisaders d'exposiziuns porschan las novas localitads tut novas pussaivladads. Il bajetg nov ha fatg enconuschent il museum sur ils cunfins dal chantun ora. Gia la segunda mesadad dal 2016 han 37'730 persunas visità il Museum d'art dal Grischun.

RR novitads 15:00