Nua è il cunfin tranter mulesta sexuala e flirtar? Tgi dastga tutgar? Tgi dastga far in tup spruh sur da la frisura ni la vestgadira? Quai n'è betg adina cler. Igl è savens in cunfin individual – schebain che l’integritad persunala na dastga mai esser periclitada.
Lavur preventiva per sensibilisar
Per che giuvnas e giuvens sajan dentant sensibilisads per questas dumondas datti organisaziuns che fan lavur preventiva. Per exempel Adebar, il post spezialisà per cussegliaziun e furmaziun a Cuira. Las collavuraturas dad Adebar organiseschan tranter auter lecziuns da scleriment sexual en scolettas e scolas cun scolaras e scolars enfin 20 onns en tut il chantun Grischun.
Susanna Siegrist Moser è la manadra dad Adebar. Per sensibilisar uffants per la tematica da cunfins sexuals dovra ella per exempel la metafra dal corp ch’è sco ina chasa cun iert.
Mintgin e mintgina ha sia chasa e ses iert. En quest iert na dastgan betg tuts entrar, ed en chasa insumma betg.
Ils uffants e giuvenils stoppian sentir sez, tgi che dastga vegnir quant damanaivel e tgi na betg, di Siegrist.
La rolla da stereotips – derasads gia tar uffants
In problem che resultia magari en mulesta sexuala sajan ils stereotips, di Gabriela Cabalzar, ch'è lavurera sociala e promotura da la giuventetgna en la Cadi. Stereotips sco per exempel «l’um pitga sin maisa» sajan anc adina derasads e quai sa sentia er tar giuvenils. Da quest stereotip resultia alura il maletg da l'um dominant e da la dunna obedaivla.
Stereotips sajan lura in problem sch'in sex vegnia restrenschids, di Susanna Siegrist Moser. Per exempel saja grev per in buob dad ir a scola cun in pullover rosa senza ch’el vegnia ris ora.
