Siglir tar il cuntegn

Header

video
Il monitoring da selvaschina cun agid digital
Or da Telesguard dals 07.05.2021.
laschar ir. Durada: 4 minutas 8 Secundas.
cuntegn

Monitoring Dumbrar selvaschina cun agid digital

Per pudair far las dumbraziuns da selvaschina il pli exact pussaivel e cun la pli pauca glieud pussaivla tiran ils guardiaselvaschina a niz l’agid dad ina camera termica. Primas experientschas mussan, ella ha plirs avantatgs.

Mintga primavaira emprova l’Uffizi da chatscha e pestga d'eruir il dumber da selvaschina ch'ha survivì il dir enviern. Pli baud cun agid da divers chatschaders che gievan en gruppas da fin a 6 persunas davos si sin autos e glischs da prestaziun per tschertgar giu tut la prada sur ed enturn ils vitgs.

Pervi da reglas pli severas ed era in zic pervi da corona fan quai per gronda part mo pli ils guardiaselvaschina. Ma da nov cun in agid modern, numnadamain cun ina camera termica che pussibilitescha d'observar ils animals da stgira notg.

Damain stress per guardiaselvaschina e selvaschina

Cun mintga nov indriz vali sco emprim era da ramassar experientschas. Ed emprimas constataziuns dals guardiaselvaschina mussan, ch'en congual cun la lavur cun las glischs, ha la selvaschina damain stress ed irritaziuns. Ed era sch'ils animals vegnan disturbads sco emprim cun las glischs, subit cur ch’igl è stgir èn els quiets e pasculeschan vinavant, malgrà ch’ils guardiaselvaschina èn anc en vischinanza. E cun animals pli quiets pon els era dumbrar pli concentrà ils trieps.

La schanza ch’ina part svanescha avant ch’els han insumma drizzà la glisch sin els, è in toc pli pitschna. Era animals che sa zuppan davos chaglias èn pli bain visiblas.

L’idea n‘è betg da remplazzar las glischs cun la camera termica, ma da trair a niz ella sco sustegn e duvrar ella, nua ch'i fa era senn
Autur: Armando Janett Guardiaselvaschina Savognin

La tecnica na saja però betg anc uschè buna sco las persunas che dovran era quella. Trieps che stattan strusch in sin l’auter èn per part pli difficils da dumbrar cun la camera termica. Ed era observaziuns dals singuls animals – schebain i sa tracta da lantschets u da vadels – èn pli simplas en il radi da la glisch

Sche la camera termica ha la fin finala era in effect sin il dumber e sch’ins sto tras quai era adattar la cifra nunenconuschenta dals animals ch’ins suppona anc, po pir vegnir evaluà suenter insaquants onns.

Ord l'archiv:

RTR Telesguard 17:40

Artitgels legids il pli savens