Siglir tar il cuntegn

Chantun Mintga segund cuschinier è da l’exteriur

La hotellaria e gastronomia è ina da las impurtantas pitgas dal Grischun. Dentant para ella ils davos onns dad adina daventar pli e pli falombra. Betg mo che las chombras e maisas restan vitas, era las plazzas d’emprendissadi èn ina giada dapli betg tuttas occupadas – cunzunt ils cuschiniers mancan.

Blers cuschiniers en las cuschinas grischunas èn da la Germania e da l’Austria.
Legenda: Mancanza d'emprendists Blers cuschiniers en las cuschinas grischunas èn da la Germania e da l’Austria. Keystone

La mancanza d’emprendists en la gastronomia ed hotellaria sentan ils manaschis grischuns cunzunt en lur cuschinas. Pertge fitg savens na cuschinan betg pli ils indigens las spezialitads grischunas e svizras.

Sche nus n’avessan betg quels collavuraturs, na fiss gnanc pussibel da mussar ina tala prestaziun.
Autur: Fluregn FraviGastro Grischun

«En bleras cuschinas è la cumpart dals cuschiniers da la Germania e da l’Austria fitg auta», di Fluregn Fravi, il manader da fatschenta da Gastro Grischun. «Sche nus n’avessan betg quels collavuraturs, na fiss gnanc pussibel da mussar ina tala prestaziun sco quai che las cuschinas en ils hotels ed ustarias mussan.» Praticamain la mesadad da las persunas che cuschinian en ina ustaria ni en in hotel grischun, sajan da l’exteriur.

Vi da l'attractivitad na manchi betg

Ch'ils emprendists mancan a las ustarias ed als hotels – betg mo ils cuschiniers – n’ha tenor Fravi dentant betg exnum da far insatge cun l’attractivitad dals mastergns. «Ils mastergns, gest er en il sectur dal cuschinar, han survegnì dapli muntada ils ultims onns», explitgescha Fravi. «Igl è dentant uschia ch’il dumber da quels che vegnan or da scola sa sminuescha adina pli fitg.»

La muntada dals mastergns, gest en il sectur dal cuschinar, è creschida ils ultims onns.
Autur: Fluregn FraviGastro Grischun

I saja pia in problem demografic che na betg tuttas plazzas d’emprendissadi èn occupadas. In problem che vegnia l'auter onn anc ina giada pli critics, perquai ch’il 2016 vegnian anc ina giada pli paucas giuvnas e giuvens or da scola. Pir il 2017 e 2018 vesia quai lura puspè ora in zichel meglier.