Siglir tar il cuntegn

Header

cuntegn

Chantun Midada dal clima ha consequenzas per ils bulieus

A Tavau han perscrutaders chattà ora en in experiment, che l’existenza da bulieus sa mida sch’il terren sa stgauda.

Perscrutaders da l’Institut federal per la perscrutaziun da guaud, naiv e cuntrada (WSL) han chattà ora a Stillberg sper Tavau, che la temperatura dal terren ha in’influenza sin la derasaziun da bulieus. Durant sis onns han els stgaudà il terren al cunfin dal guaud sur Tavau per quatter grads. Uschia han els pudì observar tge effect che la midada dal clima ha sin ils bulieus.

Ils resultads èn stads surprendents era per ils perscrutaders. Ils bulieus han reagì pli spert sin las temperaturas pli autas che spetgà. Quai resulta d’ina communicaziun da medias dal WSL da glindesdi. Sin 20 surfatschas en guauds da lareschs e tieus alpins han ils perscrutaders mess ora cabels da stgaudar.

Il glimatsch da laresch mellen è sinaquai sparì quasi cumplettain. Il latger ardent ed era il mycenus galopus (Weissmilchender Helmling) èn percunter sa derasads pli ferm. Sin il terren betg stgaudà n’è la derasaziun da bulieus betg sa midà.

Dapli nitrogen en il terratsch

Tar controllas pli precisas è sa mussà che la concentraziun da nitrogen en il terratsch è daventada pli gronda cun stgaudar il terren. Ils micro-organissems en il terratsch èn daventads pli activs ed han decumponì dapli humus e producì dubel uschè bler nitrogen sco en il terren betg stgaudà.

Tscherts bulieus sco il latger ardent profitan da dapli nitrogen en il terratsch. Tras temperaturas pli autas vegnan era las plantas a l’ur dal guaud ad avair dapli nitrogen a disposiziun. Ils perscrutaders fan però attent ch’il terren daventa era pli sitg cun temperaturas pli autas. Dapli nitrogen e damain aua, quai vegnia a midar l’effect reciproc tranter plantas, bulieus e terren.

RR novitads 14:00

Artitgels legids il pli savens