Uschè chaud sco quest onn n'era quai anc mai il prim d'avust. Ed er la notg avant era uschè chauda sco anc mai. Ad Altdorf en l'Uri n'è la temperatura durant la notg mai stada sut 27,5 grads. Record! Sper quai hai ils davos dis er dà ferms urizis. Quels haja quai dentant gia adina dà, quai di Felix Blumer, meteorolog dad SRF. Ozendi hajan ins dentant il sentiment ch'i dettia pli blers e pli ferms urizis cunzunt pervi da las medias online ed er pervi da las medias socialas che documenteschian tut en detagl.
È la midada dal clima la culpa?
Ins na sappia perquai er betg dir che la midada dal clima saja la culpa da quels fenomens. Gia pli baud haja quai dà stads fitg chaudas e sitgas u unviarns cun fitg pauca naiv. E pli tard haja quai puspè dà stads fitg bletschas ed unviarns cun fitg blera naiv. Ins stoppia propi persequitar l'aura sur radund 30 onns per pudair discurrer d'ina midada dal clima, uschia Felix Blumer.
RR actualitad 12:00