La taglia chantunala sin l'ierta duai vegnir midada ad ina taglia sin la quota d'ierta e vegnir coordinada cun la taglia communala sin la quota d'ierta.
Las midadas impurtantas èn:
- il chantun incassescha da nov ina taglia sin la part d'ierta e sin donaziuns;
- las vischnancas mantegnan lur suveranitad fiscala; ellas pon incassar vinavant ina taglia sin la part d'ierta e sin donaziuns e fixar l'autezza da las tariffas da taglia en il dretg communal;
- ultra dals conjugals e dals uffants vegnan liberads subjectivamain da l'obligaziun da pajar taglia er ils geniturs ed ils pèrs en concubinat; quai correspunda a la regulaziun en la maioritad da las vischnancas;
- per il tschep dals geniturs (fragliuns, nevs, nezzas e.u.v.) vegn incassada ina tariffa da taglia reducida ch'importa en il chantun 5% ed en las vischnancas (sco ozendi) maximalmain 5%;
- per ils ulteriurs retschaviders vegn la tariffa da taglia fixada per il chantun sin 15% (fin ussa 10%) e per las vischnancas sin maximalmain 20% (fin ussa 25%).
Exempel concret
Tuna tut fitg teoretic perquai in exempel concret: Tge sa mida sche mes bab avess da murir? Nagut, quai di Urs Hartmann, manader da l'administraziun da taglia chantunala. Auter èsi sche l'aug/barba che n'ha nagins uffants e n'è betg maridà mora. Lura stoss jau be pli pajar 5% taglia, enfin uss era quai anc 10%. Quai perquai ch'i vegn incassa ina tariffa reducida per il tschep dals geniturs.
La consultaziun dura enfin la fin favrer 2018. Prevesì è che la revisiun parziala entra en vigur l'entschatta da l'onn 2020.
RR novitads 09:00