Siglir tar il cuntegn

Chantun Michael Pfäffli – Il nov pli aut Grischun

Michael Pfäffli (PLD) da San Murezzan è il nov president dal Cussegl Grond. Pfäffli ha gudagnà l’elecziun cun 104 da 110 vuschs valaivlas. Sco vice-president è vegnì elegì Martin Aebli (PBD) da Puntraschigna.

Ceremonia en la sala dal Cussegl grond
Legenda: Ceremonia en la sala dal Cussegl grond Michael Pfäffli è gist vegnì elegì. RTR, Prisca Bundi
Michael Pfäffli
Legenda: Michael Pfäffli El è davent dad oz il pli aut Grischun. MAD

Mintg'onn en la sessiun da l'avust dal Cussegl grond vegn elegì in nov president. Il president dal parlament Grischun è uschia il pli aut Grischun. Quai onn è quai Michael Pfäffli. El ha 54 onns, è giurist, ha in'atgna interpresa, è maridà ed ha dus uffants.

Engraziament da la partida

La carriera politica da Pfäffli ha gia cumenzà cun 18 onns cura ch'el è entrà en la partida liberaldemocratica.

Dapi 10 onns è Michael Pfäffli en in Cussegl grond, el è sta durant sis onns president da partida ed ha duas giadas candidà per il Cussegl naziunal. Uschia ch'il post sco pli aut Grischun saja er in zic in «engraziel» da la partida per la lavur prestada.

Represchentar ils rumantschs

Tar il post sco president dal Cussegl grond na vai betg be persuenter da preparar las sessiuns e manar tras quellas – i va cunzunt er per represchentar ed ir a bleras occurrenzas. E malgrà che Michael Pfäffli n'è betg in rumantsch è el persvas ch'el sappia tuttina represchentar bain els. Quai perquai che sia dunna e ses uffants discurran rumantsch.

Management da temp è l'impurtant

La pli gronda sfida saja dentant betg la lavur da preparar e manar tras la sessiuns, mabain propi il represchentar. Ses antecessur Vitus Dermont è stà a radund 150 occurrenzas. Vul dir, circa trais giadas ad emna. Michael Pfäffli è dentant da l'avis ch'el dumogna tut sut in chapè. El spera en scadin cas che nagin vegn a la curta.

Resultats da las presidentas e dals presidents dal Cussegl grond

NumLieuPartidaVuschs survegnìVuschs valaivlas
Agathe Bühler-FlurySchiersPLD112117
Leo Jeker
ZizersPBD118118
Corsin Farrér
StiervaPCD105112
Christian Rathgeb
ChurPLD111112
Christina Bucher-Brini
ChurPS110113
Ueli Bleiker
RothenbrunnenPBD113115
Elita Florin-Caluori
BonaduzPCD101111
Hans Peter Michel
DavosPLD111113
Duri CampellCinuos-chelPBD113116
Vitus DermontLaaxPCD109110
Michael PfäffliSt. MoritzPLD104110

RR actualitad 12:00