Siglir tar il cuntegn
Inhalt

Chantun Meztga da chasa – Mintgin po far, ma las prescripziuns èn severas

Sch'insatgi fa meztga per il diever privat – vul dir per l'atgna famiglia – datti be paucas prescripziuns. Ma gia sch'ins vul regalar u lura vender ils products, guarda quai or tut auter.

mazler che fa liongias
Legenda: Bleras lavurs da la meztga da chasa vegnan ozendi fatgas dal mazler – tranter auter er pervi da las leschas. RTR, Gion Gieri Flepp

Cumprar per exempel in portg, mazzar ed elavurar quel a chasa cun la savida necessaria, quai dastgia da principi mintgin, di il veterinari chantunal Rolf Hanimann. Però lura dastgan er be la persuna e sia famiglia mangiar la charn.

Tar l'atgna famiglia quintan tenor Rolf Hanimann propi be quellas persunas che sesan en cuschina a maisa, e betg la tatta en l'abitaziun sura u ils giasts suten.

purtret da Rolf Hanimann
Legenda: Rolf Hanimann: Il veterinari chantunal ch'è responsabel ensemen cun il chemicist chantunal per las leschas. RTR, Gion Gieri Flepp

Per il diever privat: Be da resguardar la protecziun da l'animal

Tgi che fa ina meztga da chasa per il diever privat, sto quai che pertutga la lescha be resguardar la protecziun da l'animal tar l'act da mazzar. Dapli prescripziuns, saja quai per indrizs e maschinas, per il local da meztga ma er per l'elavuraziun, na datti tenor Rolf Hanimann betg - per quels che produceschan be per lur agen diever.

L'argument davart dal chantun ch'i na dovra en quella situaziun betg dapli reglas: Per il cas ch'insatge na saja betg en urden cun ils products, sajan er pli paucas persunas pertutgadas.

Prescripziuns severas per regalar u vender

Tut auter guarda quai or, sch'insatgi vul far meztga da chasa per lura regalar u vender ils products, per exempel en stizun sin il bain puril. Gia l'act da mazzar sto lura capitar en in local ch'è lubi uffizialmain entras il chantun.

« Ins daventa in pitschen mazler ... »

Era per elavurar la charn a chasa datti diversas prescripziuns, sch'ins producescha per dapli che be per l'atgna famiglia. Tenor Rolf Hanimann daventan ins lura numnadamain sco in pitschen mazler a chasa. Quai munta tranter auter prescripziuns sco:

  • che la cuvrida dal palantschieu sto ir bain a schubregiar
  • vi da las paraids stoi avair plattas er pervi dal schubregiar
  • la temperatura en las frestgeras è prescritta
  • i vegn controllà ch'i haja avunda glisch
  • i sto vegnir documentà tut: quant ditg è il product conservabel, cura è tge maschina vegnida schubregiada e.u.v.

Che quai èn bleras prescripziuns per insatgi che vul be far ina giada ad onn meztga da chasa per vender en la stizun dal bain puril u er sin il martgà, u simplamain per regalar - quai vesa er il veterinari chantunal Rolf Hanimann.

Perquai emprovia il chantun er adina da metter enturn las prescripziuns en relaziun cun la situaziun. Quai vul p.ex. dir ch'il pur che endrizza ses local da meztga po tut tenor tschentar plattas pli bunmartgadas ch'il mazler grond che dovra mintgadi il local.

RR actualitad 11:00