Uffizialmain ses emprim di da lavur ha Martin Vincenz cumenzà cun in tur tras ils biros e lura ha el fatg cun las collavuraturas ed ils collavuraturs in 'speed dating'. Cun mintgina e mintgin haja el discurrì 2-3 minutas avant tut ils auters per emprender d'enconuscher els in zic pli datiers. Quai saja stà ina buna chaussa ed haja già creà ina bun'atmosfera, di Vincenz.
Datings er cun las destinaziuns
Per il directur da turissem dal Grischun dovri dentant er entaifer il chantun, entaifer las destinaziuns turisticas ina bun'atmosfera, in bun spiert da cuminanza. Gronda paisa vul Vincenz metter sin la collavuraziun. El s'inscuntra perquai cun ils responsabels en las singulas destinaziuns per tschertgar il discurs. En intgins lieus è el gia stà cun ina 'road-show', en auters lieus vegn quai il proxim temp.
Vitiers vul Vincenz natiralmain persvader las destinaziuns da la nova strategia turistica e lura er guardar che tuts trajan vid il medem sughet per uschia pudair dar nov schlantsch al turissem grischun.
Ses pli grond giavisch actual fiss dentant che la naiv vegn, tant pli spert, per puspè ina giada pudair nudar ina buna stagiun d'enviern per il turissem grischun.
RR actualitad 08:00