Siglir tar il cuntegn
cuntegn

Chantun Martin Gabriel resta ad interim president da l'ANR

Martin Gabriel, ch'è a partir dal fanadur nov secretari general da la Lia Rumantscha, resta president da la fundaziun ANR ad interim. Quai munta ch'el resta fin che l'ANR chatta in nov president, quai er perquai ch'ils temps sajan il mument in zic hectics.

Martin Gabriel resta president da l'ANR e daventa nov secretari general da la Lia Rumantscha.
Legenda: Martin Gabriel resta president da l'ANR ad interim. mad

Martin Gabriel, ch'è a partir dal fanadur nov secretari general da la Lia Rumantscha, resta president da la fundaziun ANR ad interim. Quai munta ch'el resta fin che l'ANR chatta in nov president. Malgrad ch'el vuleva desdir il presidi haja il cussegl da fundaziun giavischà ch'el restia ad interim. Quai er perquai ch'ils temps sajan il mument in zic hectics. Sper quai na saja quai betg simpel da chattar in nov president, cunquai che las persunas che pon surpigliar l'uffizi sajan limitadas.

Il cussegl da fundaziun da l'ANR ha unisono giavischau che quei presidi resta tier mei il mument en vesta a la situaziun che nus havein.
Autur: Martin GabrielPresident da la fundaziun ANR

Sco proxim stoppia numnadamain ina persuna da la Val Schons surpigliar il presidi, uschia Martin Gabriel vers RTR. Sin il pli tard en in onn vul el en scadin cas avair surdà il post.

Nagin problem cun funcziun dubla

Problems cun la funcziun dubla, president da l'ANR e secretari general da la Lia Rumantscha na vesa el betg. Ins sappia schliar tut ils problems cun delegar la responsabladad da pressa al vice president da l'ANR quai è Martin Candinas u da vart da la Lia al president Johannes Flury u ad Andreas Gabriel che saja gia uss pledader da medias.

L'ANR sustegna «La Quotidiana»

Plinavant ha l'ANR communitgà, ch'ella vul porscher maun per mantegnair «La Quotidiana» e sustegnair la gasetta finanzialmain. Cun tge summa n'è dentant anc betg cler. Il sustegn duai esser ina soluziun transitorica fin la fin dal 2018.

Il cussegl da fundaziun da l’ANR sustegna plinavant che la Lia Rumantscha surpiglia la direcziun en connex cun las tractativas per il mantegniment da «La Quotidiana». Uschia duai vegnir realisada proximamain ina «maisa radunda» – sut la direcziun da la Lia Rumantscha – cun represchentants da chantun, confederaziun ed ANR.

RR novitads 15:00