Siglir tar il cuntegn

Chantun Marcus Caduff nov president dal Corpus catholicum

Per ils proxims dus onns è il Lumnezian Marcus Caduff vegnì elegì sco nov president dal Corpus catholicum, la pli auta instanza da la baselgia catolica chantunala. La cumissiun administrativa presidiescha da nov Thomas Bergamin da Zezras.

Marcus Caduff il nov president dal Corpus Catholicum e Thomas Bergamin il nov president da cumissiun administrativa da la baselgia catolica grischuna.
Legenda: Marcus Caduff il nov president dal Corpus Catholicum e Thomas Bergamin il nov president da cumissiun administrativa da la baselgia catolica grischuna. RTR, Prisca Bundi

Il Lumnezian Marcus Caduff succeda ad Urs Gaupp da Vaz Sut ch’è stà ils ultims dus onns il president dal parlament da la baselgia catolica chantunala. Nov vicepresident daventa Marcel Furger da Domat.

Cumissiun administrativa è il gremi executiv

La cumissiun administrativa ch'è l’organ executiv ed administrativ da la baselgia catolica grischuna, ha era in nov timun. Thomas Bergamin da Zezras succeda a Placi Berther ch’ha suenter tschintg onns dà giu ses uffizi. Bergamin è dapi radund 20 onns engaschà en il Corpus catholicum ed ha medemamain gia presidià quel. Il gremi sa cumpona da tschintg persunas. Dasper Bergamin fan part Silvia Casutt da Falera, Filip Dosch da Cunter, Rudolfo Fasani da Mesocco e sco secretaria Maria Bühler da Domat.

Ulteriuras tractandas

A la radunanza generala ha Markus Freitag da l'institut per scienzas politicas da l'universitad Berna fatg in referat davart il tema «Lavur voluntara sco chapital social da la Svizra».

Sper quai èn il rapport annual, il quint annual ed il protocol dal 2016/17, sco era il preventiv 2017/2018 vegnids approvads senza grondas discussiuns.

RR novitads 15:00