Siglir tar il cuntegn
cuntegn

Chantun Marca «Grischun» en novs mauns

Bunamain mintgin ha gia vis ella, la marca «Grischun» cun la scrittira «graubünden». Fin uss era Grischun vacanzas responsabel per la marca. Quai sa mida uss: Per l’entschatta 2017 vegn il product administrà da la firma «clerezza GmbH» da Gieri Spescha.

Legenda: Guardar il video Marca «Grischun» sut nova batgetta. Durada 02:30 minutas.
Or da Telesguard dals 02.12.2016.

La regenza grischuna reorganisescha la gestiun da la marca regiunala «grischun». A partir dal prim da schaner 2017 surpiglia Gieri Spescha cun la firma «clerezza GmbH» quest mandat, scriva la regenza. Gieri Spescha è stà plirs onns responsabel per il marketing da Grischun vacanzas.

Gieri Spescha e sia firma «clerezza GmbH» a Flem surpiglian nov l'administraziun da la marca.
Legenda: Gieri Spescha e sia firma «clerezza GmbH» a Flem surpiglian nov l'administraziun da la marca. RTR Telesguard

Fin uss è Grischun Vacanzas stà responsabel per la gestiun da la marca.

La nova strategia vul rinforzar ils pensums da coc, numnadamain «marca ed image», «innovaziun e products» e la «digitalisaziun».

En connex cun sia nov’orientaziun strategica ha Grischun vacanzas però returnà quest mandat al chantun, perquai che l’administraziun da marca na saja betg ina cumpetenza da coc.

«Grischun n'è betg mo il turissem»

Era en il futur vegn il turissem a duvrar il pli savens la marca «Grischun». Mo ins veglia era mussar in’autra glisch dal chantun Grischun e novs cuntegns, declera Gieri Spescha.

Tranter auter duai la culinarica survegnir ina pli gronda paisa. Il Grischun haja blers stgazis en quest segment.

Ina totalmain nova strategia da la marca na dettia dentant betg. Il logo restia vinavant il medem. Marcas da success hajan dapi tschients onns il medem logo. «Midar il logo da la marca Grischun faschess jau sco pli davos», uschia Gieri Spescha.

RR novitads 15:00 / RR actualitad 17:00