Siglir tar il cuntegn
Inhalt

Chantun Mantegnair model da finanziaziun per ospitals e tgira en Grischun

Il model da finanziaziun actual per ospitals e la tgira en il Grischun duai vegnir mantegnì. La cumissiun per sanadad e fatgs socials dal Cussegl grond na vesa nagin potenzial da spargn tar il persunal da tgira. Ella ha predeliberà il rapport da la regenza ed è d’accord cun quel.

Teaser.
Legenda: La cumissiun na vesa nagin potenzial per reducir las plazzas dal persunal da tgira, senza che la qualitad da la tgira vegniss uschia influenzada en moda negativa. Keystone

Il rapport sa basa sin in mandat che la cumissiun aveva surdà a la regenza l'october 2011. La finamira era da far examinar la regenza a moda detagliada il sistem actual da la finanziaziun dals ospitals e da la tgira e da far in rapport en chaussa.

Cun diesch cunter ina vusch è la cumissiun per sanadad e fatgs socials s'exprimida per mantegnair il model actual per la finanziaziun dals ospitals e da la tgira, scriva il chantun.

Refusà trais mesiras da la regenza

Main concordia hai dà areguard las mesiras che la regenza ha proponì. Ina maioritad da la cumissiun refusa tant la pussaivladad da differenziar la purschida en chasas da tgira sco er la cumpetenza da las vischnancas per la finanziaziun da deficits dals furniturs da prestaziuns.

Ultra da quai ha la cumissiun refusà unanimamain la mesira 4. Quella prevesa che vischnancas surpiglian ils custs betg cuvrids mo, sche las chasas da tgira realiseschan las mesiras ch'èn fixadas en las cunvegnas da prestaziun per sbassar ils custs.

Il Cussegl grond vegn a tractar questa fatschenta en la sessiun da zercladur 2016.

RR novitads 10:00